დღეს, თბილისში თავისუფლების მოედანზე "ქართული ოცნების" მხარდამჭერთა მასშტაბური აქცია გაიმართება.
მასშტაბური შეკრების ორგანიზატორების განცხადებით, მოქალაქეთა შეკრება თავისუფლების მოედანზე 15:00 საათიდან დაიწყება, აქცია კი 17:00 საათიდან არის დაგეგმილი.
ღონისძიების ორგანიზატორების განცხადებით, "ქართული ოცნების" მომხრეების შეკრება მასშტაბური იქნება და ღონისძიებაც შესაბამისად იქნება ტექნიკურად აღჭურვილი. გარდა პოლიტიკოსებისა, ორგანიზატორების თქმით, სცენა ქართველ შემსრულებლებსაც დაეთმობათ.
თავისუფლების მოედანზე შეკრებისკენ მოქალაქეებს, თავდაპირველად, "ქართული ოცნების" თავმჯდომარემ ირაკლი კობახიძემ მოუწოდა.
"27 ოქტომბერს, 17 საათზე გაიმართება ჩვენი პარტიის მხარდამჭერების შემაჯამებელი საარჩევნო შეკრება. ათეულობით ათასი ჩვენი ქვეყნის მოქალაქე შეიკრიბება იმისათვის, რომ კიდევ ერთხელ ვაჩვენოთ, თუ როგორია ქართველი ხალხის ძალა, რომელიც იბრძვის ბოროტების საბოლოოდ დასამარცხებლად, ღირსებისა და თავისუფლების დასაცავად, ჩვენი ქვეყნის წინსვლისა და განვითარებისთვის.
2 ოქტომბერს ჩვენ ნდობა გამოგვიცხადა ამომრჩევლის 47 პროცენტმა, პრაქტიკულად ყოველმა მეორე ამომრჩეველმა, რაც გვაძლევს ახალ სტიმულს და გვაკისრებს პასუხისმგებლობას, შემდეგი სამი წლის განმავლობაში ვიზრუნოთ ჩვენი ქვეყნისა და ხალხის კეთილდღეობისათვის.
ეს გამარჯვება 30 ოქტომბერს ბოლომდეა მისაყვანი. ყველა, ვისთვისაც ძვირფასია ჩვენი ქვეყნის მომავალი, მშვიდობა, სტაბილურობა და განვითარება, ოთხშაბათს, 27 ოქტომბერს გელოდებით თავისუფლების მოედანზე", - თქვა კობახიძემ.
რუსთაველის გამზირზე დაგეგმილი აქციის გამო, ტრანსპორტის მოძრაობა დროებით შეიზღუდება.
