ჰაიტის დედაქალაქ პორტ-ო-პრენსის მახლობლად, შეიარაღებულმა დაჯგუფებამ გაიტაცა ამერიკელი ქრისტიანი მისიონერები და მათი ოჯახები, მათ შორის ბავშვები. იუწყება BBC.
გავრცელებული ინფორმაციით, მისიონერები ბავშვთა სახლს სტუმრობდნენ, როდესაც ისინი დაჯგუფებამ გაიტაცა. New York Times-ის ინფორმაციით, გატაცებულია 17 ადამიანი.
მისიონერთა ჯგუფის გატაცებასთან დაკავშირებით, ჰაიტის იუსტიციის სამინისტროსა და ეროვნულ პოლიციას კომენტარი არ გაუკეთებია. ოფიციალური კომენტარისგან ჯერჯერობით თავს იკავებს ვაშინგტონიც, თუმცა სახელმწიფო დეპარტამენტის წარმომადგენელმა AFP-სთან საუბრისას განაცხადა, რომ ისინი ფლობენ ამ ინფორმაციას და "საზღვარგარეთ მყოფი ამერიკის მოქალაქეების უსაფრთხოება მათი ერთ-ერთი უმთავრესი პრიორიტეტია".
ქრისტიანული საქველმოქმედო ორგანიზაციები ჰაიტელებს დიდ დახმარებას უწევენ. აწვდიან მათ საკვებს, ტანსაცმელს, ეხმარებიან თავშესაფრების მოძიებასა და განათლების დაფინანსებაში.
ჰაიტი ადამიანთა გატაცების მაჩვენებლით მსოფლიოში ერთ-ერთი ყველაზე საფრთხის შემცველი ქვეყანაა, რადგან იქ გამეფებული უკანონობა ხელსაყრელ პირობებს ქმნის დამნაშავეთათვის, რომლებიც გამოსასყიდის მიღების მიზნით, ადამიანებს იტაცებენ.
ვითარება ჰაიტიში განსაკუთრებით პრეზიდენტ ჟოვენელ მოესეს მკვლელობის შემდეგ დაიძაბა, ვინაიდან ძალაუფლების ხელში ჩაგდების მსურველი პარტიები კონცენტრირებულები არიან პოლიტიკურ პაექრობაზე, რაც შიდა უსაფრთხოების სიტუაციას ძირს უთხრის.
შეიარაღებული დაჯგუფებები წლების განმავლობაში აკონტროლებდნენ ჰაიტის დედაქალაქის უღარიბეს უბნებს. ცოტა ხნის წინ მათ, ისარგებლეს რა არასტაბილური ვითარებით, დედაქალაქის სულ უფრო და უფრო მეტ ნაწილზე მოიპოვეს კონტროლი.
ადგილობრივი სამოქალაქო საზოგადოების ჯგუფის მონაცემებით, 2021 წლის პირველ სამ კვარტალში დაფიქსირდა 600 -ზე მეტი გატაცება.