რუსეთის პრეზიდენტმა ვლადიმირ პუტინმა განაცხადა, რომ ზედმეტად გადაჭარბებულია მღელვარება იმის შესახებ, რომ რუსეთში დემოკრატია მოკვდა. მან კრიტიკოსებს მოუწოდა თავიანთ თავზე იფიქრონ.
"მღელვარება იმაზე, რომ რუსეთში დემოკრატია მოკვდა, ძლიერ გადაჭარბებულია. როგორც ოდესღაც მარკ ტვენმა მისი გარდაცვალების შესახებ გავრცელებული ჭორების საპასუხოდ თქვა", - განაცხადა პუტინმა რუსეთის ენერგეტიკის კვირეულის ფორუმზე.
"ნუ შეშფოთდებით ჩვენს გამო, სჯობს, თქვენს თავზე იფიქროთ და იმაზე, რაც თქვენთან ხდება", - აღნიშნა პუტინმა.
მისი აზრით, "პარლამენტარიზმი ევროპაში განიცდის უამრავ პრობლემას".
მან თქვა, რომ უმჯობესია შეხედონ ტრადიციულ საპარლამენტო ქვეყნებს, დაინტერსდნენ იმით, რაც იქ ხდება, როგორ ყალიბდება იქ ხელისუფლება, რამდენი შეკითხვა ისმის კორუფციასთან დაკავშირებით. "იმავე შტატებში ეს ლობიზმია. რა არის ლობიზმი? რა არის ოფიციალური ლობიზმი აშშ-ში? ლეგალიზებული კორუფცია - აი, რა არის. ჩვენ რა, ეს არ გვესმის? ყველას ესმის, მაგრამ ჩუმად არის", - განაცხადა პუტინმა.
მან ასევე მოიყვანა მაგალითად აშშ-ში პრეზიდენტის არაპირდაპირი არჩევნები, როდესაც მისი თქმით, "ხელისუფლებაში მოდიან ადამიანები, რომლებსაც ნაკლებმა ამომრჩეველმა მისა ხმა".
რაც შეეხება რუსეთს, პუტინმა აღნიშნა, რომ რუსეთშიც არის რაღაც ხარვეზები, "მაგრამ ეს არ ნიშნავს, რომ ეს ხარვეზები ჩვენთან მეტია, ვიდრე თქვენთან, ვფიქრობ, რომ ნაკლებიც კია", - თქვა რუსეთის ლიდერმა.
მან ასევე თქვა, რომ რუსეთში ოპოზიცია ცოცხალია და მკაცრად აკრიტიკებს ხელისუფლებას.
"რაც შეეხება ოპოზიციას, ის ჩვენთან მუშაობს, ცოცხალია, აკრიტიკებს ხელისუფლებას, თანაც ისე მკაცრად აკრიტიკებს, რომ ეს სხვა ქვეყნებშიც არ ხდება", - აღნიშნა პუტინმა.
"ჩართეთ ზოგიერთი რუსული მედიასაშუალება და თქვენთვის ყველაფერი ნათელი გახდება. ისინი ხომ მუშაობენ, მათ არავინ ეხება, ყველაფერი ნორმალურადაა. უფრო მეტიც, "გაზპრომისგან" ფულსაც კი იღებენ. "გაზპრომი" ევროპაში გაზს ყიდის და ოპოზიციურ მედიას აფინანსებს", - დასძინა პუტინმა.
"რთულად იპოვი ისეთ ქვეყანას, სადაც მედია, ფაქტობრივად, ფინანსდება სახელმწიფო წყაროებიდან და დაკავებული აქვთ საწინააღმდეგო პოზიცია ხელისუფლების მიმართ, როგორც ჩვენთან. "გაზპრომი" აფინანსებს ჩვენს ერთ რადიოსადგურს, ის იკავებს უკიდურეს პოზიციას ნებისმიერი საკითხისადმი და იქ დასაქმებულ ყოველ მეორეს აქვს უცხოეთის პასპორტი ან ბინადრობის უფლება. მუშაობენ, ყველაფერი რიგზეა", - თქვა პუტინმა.