საჯარო მმართველობის რეფორმის განხორციელების შედეგები, 2021-2025 წლების სტრატეგია, გამოწვევები და პრობლემები, - ამ თემებზე ისაუბრეს საჯარო მმართველობის რეფორმის საბჭოს სხდომაზე, რომელიც ონლაინ-ფორმატში გაიმართა. შეხვედრა საქართველოს მთავრობის ადმინისტრაციის უფროსმა ილია დარჩიაშვილმა, დიდი ბრიტანეთის ელჩმა საქართველოში, მარკ კლეიტონმა, საქართველოში გაეროს განვითარების პროგრამის (UNDP) მუდმივი წარმომადგენლის მოადგილემ ანა ჩერნიშოვამ და საქართველოში ევროკავშირის წარმომადგენლობის (EUD) პროექტების განყოფილების უფროსმა სიგრიდ ბრეტელმა გახსნეს.
შეხვედრაზე განიხილეს საქართველოში საჯარო მმართველობის რეფორმის განხორციელების შედეგები და მომდევნო ფაზის პრიორიტეტული მიმართულებები. დამოუკიდებელმა ექსპერტმა წარადგინა PAR გზამკვლევი 2020-ის განხორციელების ზოგადი შედეგები.
ყურადღება გამახვილდა საჯარო მმართველობის რეფორმის ახალი 2021-2025 წლების სტრატეგიის შემუშავების მნიშვნელობაზე, არსებულ გამოწვევებსა და პრობლემებზე. რეკომენდაციები წარადგინა ეკონომიკური თანამშრომლობისა და განვითარების ორგანიზაციის მმართველობისა და მენეჯმენტის გაუმჯობესების ხელშეწყობის პროექტის (OECD/SIGMA) ექსპერტმა ალასტარ სვარბრიკმა და SIGMA-ს სახელით მზადყოფნა გამოხატა, მხარი დაუჭიროს საბჭოს ახალი სტრატეგიის მომზადების პროცესში. რეკომენდაციები წარადგინეს ასევე საბჭოს საქმიანობაში მონაწილე არასამთავრობო ორგანიზაციებმაც.
ასევე გაიმართა საჯარო მმართველობის რეფორმის (PAR) კომუნიკაციის სტრატეგიისა და Brand Book-ის პრეზენტაცია. დისკუსიის რეჟიმში მონაწილეებმა განიხილეს საჯარო მმართველობის რეფორმის კომუნიკაციის კომპონენტის მნიშვნელობა და სამომავლო ნაბიჯები მის დასახვეწად.
საჯარო მმართველობის რეფორმის უწყებათაშორისი საკოორდინაციო საბჭო, საქართველოს მთავრობის ადმინისტრაციის კოორდინაციით, დიდი ბრიტანეთის მთავრობის და გაეროს განვითარების პროგრამის (UNDP) მხარდაჭერით გაიმართა. შეხვედრის დასასრულს, პარტნიორი ორგანიზაციების წარმომადგენლებმა კიდევ ერთხელ გამოხატეს სურვილი, მხარი დაუჭირონ საქართველოში საჯარო მმართველობის რეფორმის წარმატებით განხორციელებას.
საჯარო მმართველობის რეფორმა, რომელიც საქართველოში 2015 წელს დაიწყო, ქვეყანაში გამჭვირვალე, ანგარიშვალდებული და ეფექტური სახელმწიფო მართვის სისტემის ჩამოყალიბებას ემსახურება. რეფორმის მიზანია საქართველოში საჯარო მმართველობის გაუმჯობესება და მისი დაახლოება ევროპული მმართველობის სტანდარტებთან. რეფორმა ევროკავშირის საჯარო მმართველობის პრინციპებს ეყრდნობა და მოიცავს პრიორიტეტულ მიმართულებებს, როგორიცაა პოლიტიკის დაგეგმვა და კოორდინაცია; საჯარო სამსახური და ადამიანური რესურსების მართვა; ანგარიშვალდებულება; სახელმწიფო სერვისების მიწოდება; საჯარო ფინანსების მართვა; ადგილობრივი თვითმმართველობა.
სხდომაში საბჭოს წევრი საჯარო უწყებების, ადგილობრივი სამოქალაქო და საერთაშორისო ორგანიზაციების წარმომადგენლები მონაწილეობდნენ.
