"ერთიანი ნაციონალური მოძრაობა" მიხეილ სააკაშვილის გათავისუფლების მოთხოვნით თბილისში ფართომასშტაბიან აქციას აანონსებს.
პარტიის ლიდერების ზაალ უდუმაშვილისა და თინა ბოკუჩავას განცხადებით, აღნიშნული საკითხის პარტიის პოლიტიკური საბჭოს სხდომაზე შეთანხმდა, დეტალები მოგვიანებით დაზუსტდება, კერძოდ, კონკრეტული დრო და ადგილი.
"დღეს, პოლიტსაბჭოს სხდომაზე ამაზე ვიმსჯელეთ და მიღებულია კონკრეტული გადაწყვეტილება, მათ შორის, რომ თბილისში გაიმართება ფართომასშტაბიანი აქცია მიხეილ სააკაშვილის მხარდასაჭერად და სოლიდარობისთვის. რაც შეეხება აქციის თარიღსა და დროს, ამაზე ამ წუთებში მიმდინარეობს მსჯელობა, განვიხილავთ სხვადასხვა საკითხს. ამიტომ, ახლა ვერ დაგისახელებთ თარიღს, მოგვიანებით გამოცხადდება აქციის ჩატარების ზუსტი თარიღი. ეს იყო დღევანდელი პოლიტსაბჭოს მთავარი საგანი. იქნება დიდი აქცია, რა თქმა უნდა, აქციები იქნება როგორც რეგიონებში, ასევე თბილისში", - განაცხადა ზაალ უდუმაშვილმა.
შეგახსენებთ, მიხეილ სააკაშვილი პოლიციამ 1-ელ ოქტომბერს, თბილისში დააკავა. ქვეყნის მესამე პრეზიდენტი რუსთავის სასჯელაღსრულების დაწესებულებაში უკვე მე-7 დღეა, შიმშილობს.
ფოტო: არქივი
