პარტია "საქართველოსთვის" ლიდერის გიორგი გახარიას თქმით, ის ყოველთვის ამბობდა, რომ მიხეილ სააკაშვილის ადგილი ციხეშია.
მისი თქმით, სააკაშვილის დაკავება "ქართული ოცნებისა" და "ნაციონალური მოძრაობის" შეთანხმების ნაწილია.
"მე ყოველთვის ვამბობდი, რომ სააკაშვილის ადგილი ციხეშია. ის არის გასამართლებული ქართული სასამართლოს მიერ და მიშა სააკაშვილის ადგილი არის ციხეში. მეორე, ყოველთვის ვამბობდი, რომ ეს ლოგიკურად შეთანხმებული იქნებოდა „ოცნებასთან“ და „ოცნება“ შემოიყვანდა და დააბრუნებდა მას საქართველოში. ესეც დადასტურდა. ახლა იმედი მაქვს, რომ არ გამართლდება ჩემი პროგნოზი რომ „ოცნება" მას ამნისტირებას გაუკეთებს, ისე როგორც, მაგალითად, გაუკეთა ნიკა მელიას. ქართველი კაცი ბრძენია. ეს ქვეყანა კი ჩვენია, საქართველოს მოქალაქეების და როდესაც ასეთ მასკარადს „ნაცები“ და „ოცნება“ ერთად გვიწყობენ სიმბოლურად 1 ოქტომბერს, რა თქმა უნდა, ბრძენი ქართველი კაცი ამას შესაბამის შეფასებას მისცემს არჩევნებზე", - განაცხადა გიორგი გახარიამ.
საქართველოს ყოფილი პრეზიდენტი, მიხეილ სააკაშვილი, რამდენიმე საათის წინ დააკავეს. გავრცელებული ინფორმაციის თანახმად ის რუსთავში, მე-12 პენიტენციურ დაწესებულებაშია გადაყვანილი.
