შვედეთში მშობლებს ახალშობილისთვის "ვლადიმირ პუტინის" დარქმევის უფლება არ მისცეს.
სახელმწიფო უწყებამ უარყო მშობლების ეს მოთხოვნა, რადგან მათი განმარტებით, ვლადიმირ პუტინი "შეუსაბამო და უადგილო" სახელების კატეგორიას მიეკუთვნება. ინფორმაციას Deutsche Welle ადგილობრივ გამოცემაზე დაყრდნობით ავრცელებს.
"სახელი არ უნდა შეურაცხყოფდეს მის მფლობელს, არ აყენებდეს რთულ და უხერხულ მდგომარეობაში და არ უნდა აღიქმებოდეს როგორც შეუსაბამო", - ნათქვამია სახელმწიფო უწყების განმარტებაში.
თავდაპირველად, სექტემბრის დასაწყისში, ეს მშობლები შვილისთვის "პუტინის" დარქმევას ცდილობდნენ, მაგრამ მაშინ შესაბამისმა სახელმწიფო უწყებამ უარყო მოთხოვნა იმ მოტივით, რომ შეუძლებელია ბავშვს გვარი დაერქვას სახელის ნაცვლად.
შვედური მედია არაფერს იტყობინება იმის შესახებ, თუ რამ განაპირობა მშობლების ასეთი დაჟინება, შვილს რუსეთის პრეზიდენტის სახელი დაარქვან.
