ესპანეთის კუნძულ ლა პალმაზე, რომელიც ატლანტის ოკეანეში მდებარე კანარის არქიპელაგის შემადგენლობაში შედის, ვულკან კუმბრე-ვიეხადან ამოფრქვეული ლავა ზღვის სანაპიროსკენ მიემართება. იუწყება Associated Press-ი.
კანარის კუნძულების პრეზიდენტ ანხელ ვიქტორ ტორესის თქმით, ამოფრქვევის ზონა დაფარულია ტყეებით და ნაკლებად დასახლებულია. მისი თქმით, მსხვერპლი არ არის.
მისივე განცხადებით, ლავა, რომელიც თავის სავალ გზაზე ყველაფერს ანადგურებს, დიდ მატერიალურ ზარალს მიაყენებს კუნძულს, ინფრასტრუქტურული და ეკოლოგიური თვალსაზრისით.
ლავა დაახლოებით 700 მ/სთ სიჩქარით გადაადგილდება. მან უკვე გაანადგურა 20-მდე სახლი. ადგილობრივი ხელისუფლება იძულებული გახდა 5 ათასი ადამიანის ევაკუაცია მოეხდინა.
ესპანეთის პრემიერ მინისტრმა პედრო სანჩესმა შექმნილი სიტუაციის გამო ნიუ იორკში ვიზიტი გადადო და კუნძულზე ჩავიდა.
ვულკანის ამოფრქვევამდე კუნძულზე, სადაც 85 ათასამდე ადამიანი ცხოვრობს, აღინიშნებოდა სეისმური აქტივობები. კუნძულზე ვულკანი ტენეგია 1971 წელს ამოიფრქვა.
კანარის კუნძულები ესპანეთის შემადგენლობაში შედის.