თურქეთში კორონავირუსის მიუ ვარიანტის შემთხვევები დაფიქსირდა. იუწყება თურქული გამოცემა Daily Sabah-ი ჯანდაცვის მინისტრზე დაყრდნობით.
ჯანდაცვის მინისტრ, ფაჰრეთინ კოჩას თქმით, ქვეყანაში გამოვლენილია მიუ შტამის ორი შემთხვევა.
კორონავირუსის ახალი ვარიანტი B.1.621, რომელსაც ჯანმრთელობის მსოფლიო ორგანიზაციამ ბერძნული ანბანის ასოს სახელწოდება „მიუ“ უწოდა, პირველად, 2021 წლის იანვარში, კოლუმბიაში გამოვლინდა.
ჯანმრთელობის მსოფლიო ორგანიზაციის ცნობით, მიუ ვარიანტის გლობალური გავრცელება 0.1%-ზე დაბალია, თუმცა კოლუმბიაში ინფიცირების 39%-ზე მეტი მიუ ვარიანტზე მოდის.
მიუ ვარიანტი ჯანმო-მ "საინტერესო ვარიანტთა" ნუსხაში 30 აგვისტოს შეიტანა.
სხვადასხვა კვლევის შედეგად, მიუ ვარიანტს აქვს მრავალი მუტაცია, რაც იმას ნიშნავს, რომ შესაძლოა, მან ვაქცინის მიმართ რეზისტენტობა გამოავლინოს, თუმცა იუწყებიან, რომ ამ დასკვნის გასაკეთებლად უფრო მეტი სიღრმისეული კვლევაა საჭირო.
მიუ ვარიანტი გამოვლინდა სამხრეთ ამერიკისა და ევროპის რამდენიმე ქვეყანაში.
