შეერთებული შტატების პრეზიდენტმა, ჯო ბაიდენმა, ავღანეთში ამერიკის 20-წლიანი სამხედრო მისიის დასრულების შემდეგ, თავის პირველ გამოსვლაში, შეაქო ქაბულიდან სამხედრო ევაკუაციის პროცესი და შეაფასა, როგორც "უაღრესად წარმატებული".
"ამ მისიის ბრწყინვალედ შესრულება განპირობებული იყო შეერთებული შტატების სამხედრო ძალების, ჩვენი დიპლომატებისა და დაზვერვის პროფესიონალების წარმოუდგენელი უნარებით, მამაცობითა და თავგანწირული გამბედაობით", - თქვა ბაიდენმა.
პრეზიდენტის განცხადებით, ავღანეთიდან 120 000 ადამიანზე მეტის ევაკუაცია განხორციელდა და დასძინა, რომ "ისტორიაში არცერთ ქვეყანას არასდროს გაუკეთებია მსგავსი რამ, მხოლოდ შეერთებულ შტატებს შესწევდა ამის ძალა".
ჯო ბაიდენი ასევე შეეხო იმ მოქალაქეთა საკითხს, რომლებიც ჯერ კიდევ ავღანეთში რჩებიან და განაცხადა, რომ ვაშინგტონი ყველაფერს აკეთებს მათ გამოსაყვანად.
აშშ-ის არმიამ 31 აგვისტოს, ღამით, დაასრულა სამხედრო მისია ავღანეთში, რომელიც 20 წელიწადს გრძელდებოდა. ქაბულის აეროპორტიდან გაფრინდა ბოლო ამერიკული სამხედრო თვითმფრინავი და ამით დამთავრდა ავღანეთიდან ევაკუაციის მისიაც.
