კორონავირუსის "დელტა" ვარიანტის სულ უფრო და უფრო მზარდი შემთხვევების ფონზე, ევროკავშირი კოვიდუსაფრთხო ქვეყნების სიიდან აშშ-ის ამოღებას გეგმავს. იტყობინება გამოცემა Associated Press-ი დიპლომატიურ წყაროებზე დაყრდნობით.
უსაფრთხო ქვეყნების სიიდან ამოღება ევროკავშირის ტერიტორიაზე შეერთებული შტატების ვიზიტორებისთვის შეზღუდვის დაწესებას გულისხმობს.
ე.წ. უსაფრთო ქვეყნებიის მოქალაქეებს ევროკავშირის ტერიტორიაზე გადაადგილება დამატებითი შეზღუდვების გარეშე შეუძლიათ, როგორიცაა კარანტინის გავლა ან ტესტირება.
წყაროების ინფორმაციით, ევროკავშირში ჯერ კიდევ მიმდინარეობს მსჯელობა ამ საკითხის ირგვლივ და საბოლოო გადაწყვეტილება შესაძლოა ამ კვირაში გახდეს ცნობილი.
იუწყებიან, რომ შეერთებულ შტატებთან ერთად, უსაფრთხო ქვეყნების სიიდან კოსოვოს, ისრაელის, მონტენეგროს, ლიბანისა და ჩრდილოეთ მაკედონიის ამოღებაც იგეგმება.
თუმცა, აღსანიშნავია, რომ ევროკავშირს ერთიანი დირექტივა არ აქვს Covid-19-ის ტურიზმის პოლიტიკის შესახებ, შესაბამისად, მისი გადაწყვეტილება სარეკომენდაციო ხასიათისა იქნება. შეზღუდვების დაწესება არდაწესების საკითხი კვლავ ეროვნული მთავრობების გადასაწყვეტი იქნება.
ზოგიერთი ქვეყანა მისდევს ევროკავშირის რეკომენდაციას, ზოგიერთი კი მკვეთრად განსხვავებულ საკუთარ პოლიტიკას ატარებს.
ევროკავშირმა ამერიკელი ტურისტებისთვის საზღვრები 16 ივნისს გახსნა. შეერთებული შტატების საზღვრები ევროკავშირისთვის კვლავ დახურულია.
