29 აგვისტოს, გერმანიის ერთ-ერთ უდიდეს ქალაქ კელნში, წვიმიანი ამინდს მიუხედავად, დაახლოებით ათი ათასმა ადამიანმა მიიღო მონაწილეობა ლგბტქ პრაიდში, სახეწლდეობით Christopher Street Day (ქრისტოფერის ქუჩის დღე).
ეს ღონისძიება ყოველწლიურად ტარდება სექსუალური უმცირესობების უფლებების მხარდასაჭერად და ერთ-ერთი ყველაზე მასშტაბურია გერმანიაში.
ორგანიზატორების განცხადებით, წლევანდელ ღონისძიებაში მონაწილეობის სურვილი ასზე მეტმა კლუბმა, ორგანიზაციამ და ასოციაციამ გამოთქვა, მათ შორის საერთაშორისო უფლებადამცველმა ორგანიზაცია Amnesty International-მა და საფეხბურთო კლუბმა FC Köln.
ღონისძიებაზე დასწრების შესაძლობლობა მხოლოდ ვაქცინირებულ, კორონავირუსზე უარყოფითი ტესტის მქონე ან კოვიდგადატანილ ადამიანებს ჰქონდათ. ამასთან, მსვლელობაში მონაწილეობისთვის აუცილებელი იყო ნიღბის ტარება.
გასულ წელს, კორონავირუსის პანდემიის გამო მასშტაბული მსვლელობა გაუქმდა.
Christopher Street Day - ქრისტოფერის ქუჩის დღე
1969 წლის 28 ივნისს, ნიუ იორკის გეი უბანში, გრინვიჩ ვილიჯში, ქრისტოფერის ქუჩაზე პატარა გეი ბარი "სტოუნვოლ ინ" პოლიციამ დაარბია.
თავდაპირველად, პოლიცია ტრადიციული რეიდის ჩასატარებლად შევიდა ბარში, თუმცა ბარის სტუმრებმა ამჯერად უარი თქვეს, დამორჩილებოდნენ პოლიციელთა მოთხოვნას პირადობის მოწმობის ჩვენებაზე და წინააღმდეგობა გაუწიეს. არეულობა რამდენიმედღიან დაპირისპირებაში გადაიზარდა.
სტოუნვოლის ამბოხი სამი დღე და ღამე გრძელდებოდა, მას შეუერთდნენ ფემინისტები, აფრიკელ–ამერიკელთა მოძრაობა, პაციფისტები და სხვები. ეს იყო უპრეცედენტო პროტესტი, რომელმაც მსოფლიო ლგბტ მოძრაობას ჩაუყარა საფუძველი.
სტოუნვილის ამბოხის წლისთავზე, 1970 წელს ამერიკის სხვადასხვა ქალაქში საპროტესტო აქციები გაიმართა. მოგვიანებით, მსგავსი გამოსვლები იმართებოდა მსოფლიოს სხვადასხვა ქალაქში.
კელნში ქრისტოფერის ქუჩის დღე 1991 წლიდან იმართება.