საქართველოს პრემიერ-მინისტრმა ირაკლი ღარიბაშვილმა გიორგი ანწუხელიძის ხსოვნისადმი მიძღვნილი მემორიალი ყვავილებით შეამკო და 2008 წლის რუსეთ-საქართველოს ომის დროს გარდაცვლილი ეროვნული გმირის ხსოვნას პატივი მიაგო.
მთავრობის მეთაური ახმეტის მუნიციპალიტეტის სოფელ ქვემო ალვანში, მემორიალთან, პარლამენტის თავმჯდომარე კახა კუჭავასთან, ვიცე პრემიერ, გარემოს დაცვისა და სოფლის მეურნეობის მინისტრ ლევან დავითაშვილთან, პარლამენტის დეპუტატებთან - გელა სამხარაულთან, დავით სონღულაშვილთან, დავით მათიკაშვილთან და ირაკლი ქადაგიშვილთან, მთავრობის ადმინისტრაციის რეგიონებთან ურთიერთობის დეპარტამენტის უფროს ლერი ბარნაბიშვილთან და კახეთის მხარეში სახელმწიფო რწმუნებულ ირაკლი შიოშვილთან ერთად იმყოფებოდა.
თავდაცვის ძალების უმცროსი სერჟანტი გიორგი ანწუხელიძე 2008 წლის 9 აგვისტოს, რუსეთ-საქართველოს ომში ერთ-ერთი შეტაკების შემდეგ, მოწინააღმდეგეს ტყვედ ჩაუვარდა. იგი წამებით მოკლეს. 2013 წელს გიორგი ანწუხელიძეს საქართველოს ეროვნული გმირის წოდება მიენიჭა. იგი ასევე დაჯილდოებულია, სიკვდილის შემდეგ, ვახტანგ გორგასლის I ხარისხის ორდენით და საქართველოს თავდაცვის სამინისტროს უწყებრივი მედლით - „სამშობლოსათვის თავდადებული“.
