გარემოს დაცვისა და ბუნებრივი რესურსების საპარლამენტო კომიტეტში შინაური ცხოველების ყოლისა და შენახვის წესების შესახებ კანონპროექტი პირველი მოსმენით განიხილეს.
კანონპროექტი "საქართველოს ადმინისტრაციულ სამართალდარღვევათა კოდექსში ცვლილებებისა და დამატებების შეტანის თაობაზე" აჭარის ავტონომიური რესპუბლიკის უმაღლესმა საბჭომ მოამზადა, რომლის მიხედვითაც 103 მუხლში დამატება შედის.
ცვლილების მიხედვით, ძაღლების ალიკაპის ან საბმელის, ასევე უსაფრთხოების სხვა საშუალების გარეშე ყოლა დასასვენებელ ადგილებში ან თვითმმართველი ქალაქის ტერიტორიაზე არსებულ სხვა საზოგადოებრივ ადგილებში 100-ლარიანი ჯარიმით დაისჯება.
როგორც კომიტეტის სხდომაზე აჭარის ავტონომიური რესპუბლიკის უმაღლესი საბჭოს წევრმა, პეტრე ზამბახიძემ აღნიშნა, ხშირია შემთხვევები, როდესაც უმეთვალყურეოდ გაშვებული შინაური ცხოველები ბულვარში, პარკებსა თუ სხვა დასასვენებელ ადგილებში დადიან.
"ძაღლები საზოგადოებრივი თავშეყრის ადგილებში დაჰყავთ ალიკაპისა და საბმელების გარეშე. ცხოველები აბინძურებენ გარემოს და საფრთხეს უქმნიან ადამიანებს. ყოველივე ეს უარყოფითად აისახება თვითმმართველი ერთეულის ტურისტულ იმიჯზედაც", - აღნიშნა მან.
ზამბახიძის განმარტებით, მიუხედავად იმისა, რომ თვითმმართველი ერთეულის და პოლიციის შესაბამისი სამსახურები საკითხის გადასაწყვეტად სხვადასხვა ღონისძიებას ახორციელებენ, მათი ძალისხმევა არაეფექტურია, რადგან ადმინისტრაციულ სამართალდარღვევათა კოდექსი ამისთვის პასუხისმგებლობას არ ითვალისწინებს.
კანონპროექტის ავტორები ცდილობენ, წარმოდგენილი პროექტით გადაჭრან როგორც ველოსიპედით, მოტოციკლით, კვადროციკლით და სხვა ტიპის მოძრავი საშუალებებით საზოგადოებრივი დასვენების ადგილებში გადაადგილებისას დადგენილი წესების, ასევე სკუტერით, მოტონავით, ჰიდროციკლით და სხვა ზომამცირე მცურავი საშუალებებით სარგებლობის წესების, ავტომანქანების პარკირების წესების დარღვევის პრობლემები და სხვა.
კომიტეტის თავმჯდომარის პირველი მოადგილის ზაალ გამცემლიძის შეფასებით, კანონპროექტის ავტორებს ადამიანთა უფლებების დაცვის პარალელურად, მხედველობიდან არ უნდა გამორჩეთ ცხოველთა უფლებების დაცვაც.
გამცემლიძის განმარტებით, საქმე ისაა, რომ ყველა ძაღლისთვის ალიკაპის გაკეთება დაუშვებელია და ამდენად კანონპროექტის ყველა მათგანზე გავრცელება არ შეიძლება.