სააკაშვილი უკვე მეჩვიდმეტედ იმეორებს, რომ უნდა ჩამოვიდეს საქართველოში და სათავეში ჩაუდგეს ოპოზიციურ მოძრაობას, - აცხადებს პარლამენტის პირველი ვიცე-სპიკერი გია ვოლსკი მიხეილ სააკაშვილის განცხადებასთან დაკავშირებით, სადაც ის ამბობს, რომ საქართველოში დაბრუნდება.
ვოლსკის თქმით, სააკაშვილი სერიოზულ პრობლემებს უქმნის ზოგადად ოპოზიციურ სპექტრს და საკმაოდ რთულ მდგომარეობაში აყენებს საკუთრივ "ნაციონალურ მოძრაობასაც".
„მიხეილ სააკაშვილი არის პოლიტიკური ფიგურა, რომელიც რევოლუციური სცენარის განვითარებას მუდმივად ცდილობს. რეალურად, მიხეილ სააკაშვილი არის დესტრუქციის სიმბოლო, რომელიც საკმაოდ სერიოზულ ჩრდილს აყენებს ოპოზიციურ პოლიტიკურ სპექტრს, რომლებიც დაქვემდებარებული არიან „ნაცმოძრაობის“ დიქტატს. როცა მათი ლიდერები სხვა ლიდერებს აბუჩად აგდებით და დამამცირებელი ტერმინებით ესაუბრებიან, ეს არის მცირე ინდიკატორი იმისა, თუ ვინ განაპირობებს დესტრუქციულ პროცესებს.
არ ვფიქრობ, რომ ამ საკითხებთან მიმართებით თანმიმდევრულობა არ აქვს სააკაშვილს, იგი თანმიმდევრულად, უკვე მეჩვიდმეტედ იმეორებს, რომ უნდა ჩამოვიდეს საქართველოში და სათავეში ჩაუდგეს ოპოზიციურ მოძრაობას. ძალიან ძნელია გარე შემფასებლად დავაყენო თავი, მაგრამ თუ პოლიტიკური პლატფორმიდან არ ვიტყვი, ვფიქრობ, სერიოზულ პრობლემებს უქმნის ზოგადად ოპოზიციურ სპექტრს, მის ავტორიტეტს, ინტელექტს და საკმაოდ რთულ მდგომარეობაში აყენებს მათ შორის, „ნაცმოძრაობას“, – განაცხადა გია ვოლსკიმ.
