შეერთებული შტატების პრეზიდენტი ჯო ბაიდენი მოუწოდებს შტატებისა და ადგილობრივ ხელისუფლებებს, ვაქცინაციის კამპანიის სტიმულირებისთვის, ყოველ ახლადაცრილ ამერიკელს 100 დოლარი გადაუხადონ. ინფორმაციას ადასტურებს შტატების სახაზინო დეპარტამენტი.
"დღეს პრეზიდენტი მოუწოდებს შტატებს, ტერიტორიულ და ადგილობრივ მთავრობებს, უზრუნველყონ 100 დოლარის გადახდა ყოველი ახლად აცრილი ამერიკელისთვის, როგორც დამატებითი სტიმული ვაქცინაციის დონის ასამაღლებლად, საზოგადოების დასაცავად და სიცოცხლეთა გადასარჩენად. სახაზინო დეპარტამენტი მზად არის ტექნიკური დახმარება აღმოუჩინოს შტატებსა და ადგილობრივ ხელისუფლებებს, რათა მათ ეფექტურად გამოიყენონ თანხები თავიანთ თემებში ვაქცინაციის მხარდასაჭერად", - ნათქვამია სახაზინო დეპარტამენტის მიერ გავრცელებულ განცხადებაში.
პრეზიდენტი უახლოეს ხანებში მიმართავს მოქალაქეებს, სადაც ამ ინიციატივას გააჟღერებს. ამასთან, ბაიდენი გეგმავს გამოაცხადოს, ფედერალურ უწყებებში დასაქმებულთა სავალდებულო ვაქცინაციის შესახებ.
გუშინ, მსგავსი ინიციატივით ნიუ-იორკის მერია გამოვიდა.
