ჯანმრთელობის მსოფლიო ორგანიზაციის წამყვანი მეცნიერის, COVID-19-თან ბრძოლის ტექნიკური ჯგუფის ხელმძღვანელის, მარია ვან კერკხოვეს განცხადებით, მსოფლიო სულ უფრო და უფრო შორდება კორონავირუსის პანდემიის დასასრულს.
მისივე თქმით, პანდემიას კიდევ უფრო ახანგრძლივებს ისეთი ფაქტორები, როგორებიცაა ვირუსის ახალი შტამების გაჩენა, პრევენციული ზომების შეუსრულებლობა და ვაქცინების ნაკლებობა.
"ჩვენ ძალიან საშიშ სიტუაციაში ვართ. სიტუაცია უფრო და უფრო რთულდება და ჩვენ ამ პანდემიის დასრულებასთან სულ უფრო და უფრო შორს ვართ", - თქვა კერკხოვემ.
COVID-19-თან ბრძოლის ტექნიკური ჯგუფის ხელმძღვანელმა აღნიშნა, რომ გასული კვირის განმავლობაში მსოფლიოში დაავადების ახალი შემთხვევების რიცხვი 11,5 პროცენტით, ხოლო სიკვდილიანობა 1 პროცენტით გაიზარდა.
მისივე თქმით, ევროპაში ახალი შემთხვევების რაოდენობა 21%-ით გაიზარდა, ხოლო წყნარი ოკეანის დასავლეთ ნაწილში - 30%-ით.