საფრანგეთში კორონავირუსის პანდემიის მეოთხე ტალღა დაიწყო. ამის შესახებ საფრანგეთის მთავრობის პრესსპიკერმა გაბრიელ ატალმა განაცხადა.
"ჩვენ პანდემიის მეოთხე ტალღაში შევედით. სავარაუდოდ, ეს იქნება ძალიან მძიმე ტალღა. ვირუსი ელვის სისწრაფით ვრცელდება", - განაცხადა პრესსპიკერმა.
მისი განცხადებით, მთავრობა ყველაფერს გააკეთებს, რომ მეოთხე ტალღა არ იყოს იმაზე დამანგრეველი შედეგების მომტანი, ვიდრე წინა ტალღები და მოსახლეობასაც მოუწოდა, დაიცვან რეკომენდაციები.
მთავრობის პრესსპიკერის თქმით, გასული კვირის განმავლობაში, საფრანგეთში ვირუსის ახალი შემთხვევები 125% -ით გაიზარდა და გამოვლენილი შემთხვევების 80% წარმოადგენს განსაკუთრებით საშიშ შტამს "დელტა".
ინდური შტამის გავრცელების ფონზე, საფრანგეთში ზედიზედ მესამე დღეა კორონავირუსის 10 ათასზე მეტი ახალი შემთხვევა ფიქსირდება. გასული 24 საათის განმავლობაში, საფრანგეთში ვირუსით ინფიცირების 12.5 ათასი ახალი შემთხვევა დაფიქსირდა. სულ ქვეყანაში აღრიცხულია 5.9 მლნ შემთხვევა.
