გერმანიის კანცლერმა ანგელა მერკელმა წყალდიდობის შედეგად დაზარალებული რეგიონები მოინახულა და ადგილობრივ მოსახლეობას შეხვდა.
მერკელმა სწრაფი ფინანსური დახმარება აღუთქვა რეგიოებნსა და მის მოსახლეობას, რომელთაც წვიმებისა და წყალდიდობის შედეგად აურაცხელი ზიანი მიადგათ.
ძლიერი და გადაუღებელი წვიმის შედეგად მდინარეები კალაპოტიდან გადმოვიდა, დატბორა ავტომაგისტრალები, სახლები, წალეკა გზები და ავტომანქანები.
დასავლეთ ევროპაში მძლავრ წყალდიდობას 187 ადამიანი ემსხვერპლა, მათ შორის 157 გერმანიაში.
"ეს საშინელებაა. გერმანულ ენაში ძნელად მოიძებნება სიტყვა, რომელიც ამ ტრაგედიას აღწერს", - განაცხადა კანცლერმა რაინლანდ-პფალცის მხარის ქალაქ ადენაუს მოსახლეობასთან საუბრისას.
წყალდიდობამ გერმანიაში განსაკუთრებით რაინლანდ-პფალცისა და ჩრდილოეთ რაინ-ვესტფალიის მიწები დააზარალა.
ორივე მიწის ტერიტორიაზე გრძელდება სამუშაოები მოსახლეობის გადასარჩენად, ასობით ადამიანი კვლავ დაკარგულია.
უამინდობამ ასევე პრობლემები შექმნა ნიდერლანდებში, საფრანგეთსა და ბელგიაში, სადაც ათეულობით ადამიანის ევაკუაცია გახდა საჭირო.