ევროკომისიამ წამოიწყო იურიდიული საქმისწარმოება პოლონეთისა და უნგრეთის წინააღმდეგ, ლგბტქ დისკრიმინაციის გამო.
უნგრეთი ევროკავშირის მხრიდან ფართო კრიტიკის ობიექტი მას შემდეგ გახდა, რაც უნგეთის პარლამენტმა მიიღო კანონი, რითაც სკოლებში იკრძალება ისეთი შინაარსის მასალების გავრცელება, რაც კანონის ინიციატორების აზრით, ხელს უწყობს ჰომოსექსუალობასა და სქესის შეცვლას.
მანამდე პოლონეთის 100-ზე მეტმა რაიონმა თავი "ლგბტქ იდეოლოგიისგან თავისუფალ ზონად" გამოაცხადა, რამაც ევროკავშირის მხრიდან მკაცრი დაგმობა გამოიწვია.
"ევროპა არასდროს დაუშვებს ჩვენი საზოგადოების წევრების სტიგმატიზაციას", - აღნიშნულია ევროკომისიის განცხადებაში.
"თანასწორობა და ადამიანის უფლებებისა და ღირსების პატივისცემა ევროკავშირის მთავარი ღირებულებებია, რომელიც ევროგაერთიანების ხელშეკრულების მეორე მუხლში მკაფიოდ არის აღნიშნული. კომისია გამოიყენებს თავის ხელთ არსებულ ყველა ინსტრუმენტს ამ ღირებულებების დასაცავად", - ნათქვამია განცხადებაში.
პოლონეთსა და უნგრეთს ორი თვე აქვთ იმისთვის, რათა უპასუხონ სარჩელს.
რას გულისხმობს უნგრეთის ანტი-ლგბტქ კანონი?
უნგრეთის პარლამენტმა 15 ივნისს, ოპოზიციური პარტიებისა და უფლებადამცველი ორგანიზაციების მწვავე კრიტიკის ფონზე, უნგრეთის პარლამენტმა მიიღო კანონი, რითაც სკოლებში იკრძალება ისეთი შინაარსის მასალების გავრცელება, რაც კანონის ინიციატორების აზრით, ხელს უწყობს ჰომოსექსუალობასა და სქესის შეცვლას.
გარდა ამისა, ახალი რეგულაციებით, უნგრეთში აიკრძალა ბავშვებისთვის ხელმისაწვდომი ყველა მასალა, მათ შორის ფილმები და წიგნები, სადაც სექსუალობა მხოლოდ ჰეტეროსექსუალობად არ არის წარმოჩენილი.
კანონის მხარდამჭერები აცხადებენ, რომ სკოლებში ამგვარი შინაარსის მასალების აკრძალვა ხელს შეუწყობს პედოფილიის წინააღმდეგ ბრძოლას.
კანონის კრიტიკოსები და უფლებადამცველები კი ამბობენ, რომ პედოფილიისა და ჰომოსექსუალობის ერთმანეთთან დაკავშირება მიუღებელი და დისკრიმინაციულია.
კანონი ასევე გააკრიტიკეს ბუნდოვანი ფორმულირების გამო, რამაც გამოიწვია შიში, რომ ცისარტყელას დროშის ფრიალიც კი შეიძლება დასჯადი გახდეს.
ხუთშაბათს, ევროკომისიამ განაცხადა, რომ უნგრეთმა ვერ გაამართლა ასეთი შეზღუდვების დაწესების ლეგიტიმურობა, რითაც დაარღვია ევროპული კანონმდებლობა.
ევროკომისიის ხელმძღვანელმა ურსულა ფონ დერ ლეიენმა არაერთხელ გააკრიტიკა უნგრეთის კანონი და მას "სამარცხვინო" უწოდა.
რას გულისხმობს პოლონეთის "ლგბტქ იდეოლოგიისგან თავისუფალი ზონები?"
პოლონეთის 100-ზე მეტი რაიონის ხელმძღვანელობამ განაცხადა, რომ თავს შეიკავებენ ისეთი ქმედებებისგან, რომელიც ხელს შეუწყობს ჰომოსექსუალობის მიმართ შემწყნარებლობის დამკვიდრებას.
ამასთან, მუნიციპალიტეტები თავიანთ ბიუჯეტიდან მოერიდებიან იმ არასამთავრობო ორგანიზაციებისთვის ფინანსური დახმარების გაწევას, რომლებიც თანასწორობის საკითხებზე მუშაობენ.
ევროკომისიის განცხადებით, ვარშავამ მარცხი განიცადა, რადგან ვერ შეძლო თანასწორობის დამკვიდრება იმ მუნიციპალიტეტებში, რომლებმაც თავი ლგბტქ-სგან თავისუფალ ზონებად გამოაცხადეს.
"ევროკომისია შეშფოთებულია იმით, რომ შესაძლოა, ამ მუნიციპალიტეტების გადაწყვეტილებამ დაარღვია ევროკავშირის კანონი სექსუალური ორიენტაციის ნიშნით დისკრიმინაციის აკრძალვის შესახებ", - ვკითხულობთ ევროკომისიის მიერ გავრცელებულ განცხადებაში.
ევროკომისია უფლებამოსილია გადადგას სამართლებრივი ნაბიჯები წევრი სახელმწიფოს წინააღმდეგ, თუ ჩათვლის, რომ ისინი არღვევენ ბლოკის კანონმდებლობას. ამ პროცესმა საბოლოოდ შეიძლება დიდძალი ჯარიმის დაწესება გამოიწვიოს.