ბანგლადეშის პოლიციამ დააკავა ქარხნის მეპატრონე, სადაც ხუთშაბათს, გვიან ღამით გაჩენილ ხანძარს 52 ადამიანი შეეწირა, ხოლო 50-ზე მეტი დაშავდა.
ხანძართან დაკავშირებით, პოლიციამ სულ 8 ადამიანი დააკავა. მათ შორის არის Hashem Foods-ის მფლობელი აბულ ჰაშემი და მისი ოთხი ვაჟი. სწორედ ამ კომპანიის მფლობელობაში იყო საკვებისა და სასმელების ქარხანა.
პოლიცია იუწყება, რომ რვავე ადამიანი მკვლელობის ბრალდებით დააკავეს.
ხელისუფლების განცხადებით, ხანძრის დროს, შენობაში მყოფმა მუშებმა გარეთ გამოღწევა ვერ მოახერხეს, რადგან გასასვლელები დაკეტილი იყო.
ხანძრის მსხვერპლთა და დაშავებულთა შორის ბავშვებიც აღმოჩნდნენ. პარალელურად, დაიწყო გამოძიება ბავშვთა იძულებით შრომის შესახებ.
Hashem Foods არის მულტინაციონალური კონგლომერატის Sajeeb Group-ის ნაწილი. დაკავებული აბულ ჰაშემი არის Sajeeb Group-ის თავმჯდომარე და მმართველი დირექტორი. დაკავებულები არიან ასევე ჯგუფის აღმასრულებელი დირექტორი და სხვა მაღალი თანამდებობის პირები.
დაკავებამდე აბულ ჰაშემი მედიასთან აცხადებდა, ხანძარს რომელიმე მუშის დაუდევრობა გამოიწვევდა, ალბათ ანთებული სიგარეტი გადააგდო, რამაც ხანძარი გამოიწვიაო.
ექვსსართულიან შენობაში ხანძარი ხუთშაბათს, ადგილობრივი დროით, დაახლოებით 5 საათზე გაჩნდა. იმ დროისთვის, ქარხანაში რამდენიმე ასეული ადამიანი იმყოფებოდა.
თვითმხილველების მონათხრობის თანახმად, რამდენიმე ადამიანი ფანჯრიდან გადმოხტა. იუწყებიან, რომ მუშებმა ვერ მოახერხეს ვერც სახურავზე ასვლა და ვერც მთავარი კარიბჭიდან გამოსვლა, რადგან გასასვლელები ჩაკეტილი იყო.
ადგილობრივი ხელისუფლების წარმომადგენლები აცხადებენ, რომ ცეცხლის გავრცელებას ხელი შეუწყო პლასტმასის კონტეინერებმა და ქიმიურმა ნივთიერებებმა, რომელსაც საკვების დასამზადებლად და შესაფუთად იყენებენ.
ხანძარს სამაშველო ჯგუფები დაახლოებით 24 საათის განმავლობაში აქრობდნენ.
დაზარალებულთა ოჯახის წევრები ამბობენ, რომ ქარხანა არ შეესაბამებოდა ხანძარსაწინააღდეგო მოთხოვნებს.