უკრაინის თავდაცვის სამინისტროს განცხადებით, რუსეთმა ჰაკერული თავდასხმები განახორციელა უკრაინის საზღვაო ძალების ვებგვერდზე.
თავდაცვის უწყების ინფორმაციით, კიბერთავდასხმის შედეგად, შავ ზღვაში მიმდინარე სამხედრო სწავლების Sea Breeze 2021-ის შესახებ არაერთი ყალბი ანგარიში გამოაქვეყნეს.
კიბერშეტევის შედეგად ვებგვერდმა დროებით მუშაობა შეწყვიტა.
ჰაკერებმა ასევე შეუტიეს უკრაინის თავდაცვის სამინისტროს ვებგვერდს, თუმცა უწყების ინფორმაციით, მათი მოქმედება "წარუმატებელი" აღმოჩნდა.
"საერთაშორისო სამხედრო თანამშრომლობისა და პარტნიორი ქვეყნების უკრაინისადმი დახმარების პროექტები ტრადიციულად არაადეკვატურ ემოციებს იწვევს რუსეთის ფედერაციის სამხედრო-პოლიტიკურ ხელმძღვანელობაში", - განაცხადა უკრაინის თავდაცვის სამინისტრომ.
სამინისტროს განცხადებით, ამ მხრივ, არც სწავლება Sea Breeze 2021 იყო "გამონაკლისი".
შეგახსენებთ, შავ ზღვაში აშშ-ის მე-6 ფლოტისა და უკრაინის საზღვაო ძალების ერთობლივი ორგანიზებით, სწავლება Sea Breeze მიმდინარეობს.
სამხედრო მანევრები 28 ივნისს დაიწყო და 10 ივლისის ჩათვლით გაიმართება.
სწავლება საზღვაო, სახმელეთო და საჰაერო კომპონენტებს მოიცავს და მისი მიზანია მონაწილე ქვეყნების სამხედრო-საზღვაო ძალებს შორს ურთიერთქმედების დახვეწა და, რეგიონული საზღვაო უსაფრთხოების უზრუნველსაყოფად, მათი ერთობლივი შესაძლებლობების გაზრდა.
სწავლების ისტორიაში, Sea Breeze 2021 ყველაზე მასშტაბურია. მასში ექვსი კონტინენტის 32 ქვეყნის 5000-მდე პერსონალი, 32 გემი, 40 საჰაერო ხომალდი და სპეციალური ოპერაციებისა და მყვინთავთა 18 ჯგუფი მონაწილეობს.
სამხედრო-საზღვაო წვრთნებში საქართველოც მონაწილეობს.
