მალტის ხელისუფლების განცხადებით, ის იქნება პირველი ევროპული სახელმწიფო, რომელიც საზღვრებს დახურავს ყველა პირისთვის, ვინც სრულად არ არის ვაქცინირებული კოვიდ-19-ის საწინააღმდეგო ვაქცინით.
ეს გადაწყვეტილება უკავშირდება ვირუსის გავრცელების ახალი შემთხვევების ზრდას.
მალტის ჯანდაცვის მინისტრის განცხადებით, ქვეყანაში 14 ივლისიდან მიესალმებიან მხოლოდ მათ, ვინც ფლობს ბრიტანულ ან ევროკავშირის კოვიდსერტიფიკატს.
"14 ივლისიდან მალტაში ჩამოსვლის მსურველს უნდა ჰქონდეს მალტის, ბრიტანეთის, ან ევროკავშირის მიერ აღიარებული კოვიდსერტიფიკატები", - თქვა ჯანდაცვის მინისტრმა.
"ჩვენ ვიქნებით პირველი ქვეყანა ევროპაში, რომელიც ამ ნაბიჯს გადადგამს", - დასძინა მან.
მალტაში ვაქცინაციის კამპანია წარმატებულად მიმდინარეობს. ამ დროისთვის, ზრდასრული მოსახლეობის 79% სრულად ვაქცინირებულია.
დასმულ შეკითხვაზე, თუ რამდენად სამართლიანია სავალდებულო ვაქცინაციის მოთხოვნა ასეთ მოკლე დროში, მინისტრმა უპასუხა: "სამართლიანი ადგილობრივი მოსახლეობის რისკის ქვეშ დაყენება არ არის. ჩვენ ჯერ საკუთარ მოსახლეობას უნდა მივხედოთ".
ბოლო მონაცემებით, მალტაზე ვირუსის 30 851 შემთხვევაა აღრიცხული, გარდაიცვალა 420 პაციენტი.