ევროკავშირის მედიკამენტების სააგენტოს (EMA) ინფორმაციის თანახმად, გულის ანთება შეიძლება იყოს "ფაიზერისა" და "მოდერნას" ვაქცინების "ძალიან იშვიათი" გვერდითი ეფექტი. იუწყება BBC-ი მედიკამენტების სააგენტოს დასკვნაზე დაყრდნობით.
სააგენტომ განაცხადა, რომ გვერდითი მოვლენები უფრო ხშირია ახალგაზრდა მამაკაცებში.
ევროკავშირის მარეგულირებელი ორგანოს თქმით, კოვიდის საწინააღმდეგო ვაქცინების სარგებელი კვლავ აჭარბებს ყოველგვარ რისკს.
ამასთან, სააგენტო ურჩევს ექიმებსა და პაციენტებს, ყურადღება გაამახვილონ გულის ანთების სიმპტომებზე - ტკივილი გულ-მკერდის არეში, სუნთქვის უკმარისობის შეგრძნება, გულისცემის რიტმის დარღვევა, არითმია, გულის ფრიალის შეგრძნება.
ვაქცინებთან შეიძლება იყოს დაკავშირებული მიოკარდიტის სახელით ცნობილი გულის კუნთს ანთება და პერიკარდიტის სახელით ცნობილი გულის პერანის, გულის გარეთა გარსის ანთება.
EMA-ს ინფორმაციით:
ფაიზერის ვაქცინის შემთხვევაში - 177 მილიონი ვაქცინირებულიდან მიოკარდიტის 145 შემთხვევა გამოვლინდა, 138 კი პერიკარდიტისა.
მოდერნას ვაქცინის შემთხვევაში - 20 მილიონი ვაქცინირებულიდან მიოკარდიტის და პერიკარდიტის 19-19 შემთხვევა გამოვლინდა.
5 ადამიანი გარდაიცვალა. მიმოხილვაში ნათქვამია, რომ ისინი ხანდაზმულები იყვნენ და სხვა დაავადებებიც აღენიშნებოდათ.
მედიკამენტების სააგენტო ხაზგასმით ანიშნავს, რომ მიოკარდიტისა და პერიკარდიტის წარმოქმნის რისკები ძალზედ მცირეა, მაგრამ მნიშვნელოვანია ადამიანებს ჰქონდეთ ინფორმაცია, რომელიც დაეხმარება მათ გართულებების თავიდან ასაცილებლად.
გულის ანთებასთან კავშირი მხოლოდ იმ ვაქცინებთან მიმართებაში გამოვლინდა, რომლებიც იმუნური სისტემის მოსამზადებლად mRNA ტექნოლოგიას იყენებს.
ევროკავშირის მედიკამენტების სააგენტომ, ასევე გასცა რეკომენდაცია, რომ ადამიანებს, რომელთაც "კაპილარების გაჟონვის სინდრომი" აქვთ, არ აიცრან Johnson & Johnson-ის ერთდოზიანი ვაქცინით.