ბანგლადეშის ქალაქ რუპგანჯაში საკვებისა და სასმელების მწარმოებელ ქარხანაში გაჩენილ ხანძარს სულ მცირე 52 ადამიანი ემსხვერპლა.
ხანძრის შედეგად სამ ათეულზე მეტი ადამიანი დაშავდა. საგანგებო სიტუაციების სამსახურის განცხადებით, დაღუპულთა რიცხვი შესაძლოა გაიზარდოს, ვინაიდან რამდენიმე ადამიანი დაკარგულად ითვლება.
სამაშველო-საძიებო სამუშაოები ამ დრომდე მიმდინარეობს.
ექვსსართულიან შენობაში ხანძარი ხუთშაბათს, ადგილობრივი დროით, დაახლოებით 5 საათზე გაჩნდა. ამ დროისთვის, ქარხანაში რამდენიმე ასეული ადამიანი იმყოფებოდა. თვითმხილველების მონათხრობის თანახმად, რამდენიმე ადამიანი ფანჯრიდან გადმოხტა. იუწყებიან, რომ მუშებმა ვერ მოახერხეს ვერც სახურავზე ასვლა და ვერც მთავარი კარიბჭიდან გამოსვლა, რადგან გასასვლელები ჩაკეტილი იყო.
ადგილობრივი ხელისუფლების წარმომადგენლები აცხადებენ, რომ ცეცხლის გავრცელებას ხელი შეუწყო პლასტმასის კონტეინერებმა და ქიმიურმა ნივთიერებებმა, რომელსაც საკვების დასამზადებლად და შესაფუთად იყენებენ.
დაზარალებულთა ოჯახის წევრები ამბობენ, რომ ქარხანა არ შეესაბამებოდა ხანძარსაწინააღდეგო მოთხოვნებს.