ჯანმრთელობის მსოფლიო ორგანიზაციამ რუსეთში იანვარში გამოვლენილი კორონავირუსის AT.1-ის ვარიანტი გამოსაკვლევ სიაში შეიტანა. ამის შესახებ ჯანმო-ს განცხადებაშია ნათქვამი.
დოკუმენტის თანახმად, რუსული შტამის ძირეულ შესწავლას ჯანმო-ში 9 ივლისიდან შეუდგებიან. გამოსაკვლევ ვარიანტებს შორის ასევე არის აშშ-ში, ბრაზილიაში, ფილიპინებზე, ინდონეზიაში, კოლუმბიასა და დიდ ბრიტანეთში გამოვლენილი შტამებიც.
ჯანმო-ს სიაში შესასწავლად შეაქვს SARS-CoV-2-ის შტამები გენეტიკური ცვლილებებით, რომლებიც სავარაუდოდ, გავლენას ახდენენ ვირუსის თვისებაზე და შესაძლოა, მომავალში წარმოადგენდეს უდიდეს რისკებს.
დღეისათვის ჯანმრთელობის მსოფლიო ორგანიზაციის მიერ კორონავირუსის მხოლოდ ოთხი მუტაციაა აღწერილი, როგორც "შემაშფოთებელი":
ალფა - ბრიტანეთში აღმოჩენილი შტამი;
ბეტა - სამხრეთ აფრიკაში აღმოჩენილი შტამი;
გამა - ბრაზილიაში აღმოჩენილი შტამი;
დელტა - ინდოეთში აღმოჩენილი შტამი. ეს უკანასკნელი კვლავ აგრძელებს მუტაციას.
