იაპონიის ხელისუფლების გადაწყვეტილებით, კორონავირუსის ეპიდემიოლოგიური ვითარების გათვალისწინებით, ტოკიოს ზაფხულის ოლიმპიური თამაშები მაყურებლის გარეშე ჩაივლის.
აღნიშნული გადაწყვეტილების შესახებ მინისტრმა ტამაე მარუკავამ გამოაცხადა, რომელიც იაპონიაში ოლიმპიური და პარაოლიმპიური თამაშების ჩატარების საორგანიზაციო საკითხებს განაგებს.
ადრე მიღებული გადაწყვეტილების თანახმად, ტრიბუნებზე დაუშვებდნენ 10 ათას მაყურებელს იმ პირობით, რომ არენები 50 პროცენტზე მეტად არ შეივსებოდა. აღსანიშნავია, რომ ოლიმპიური თამაშები გაიმართება როგორც ტოკიოში ასევე მეზობელ პრეფექტურებში. გადაწყვეტილია, რომ ტოკიოში გამართულ თამაშებს მაყურებელი არ დაესწრება, ხოლო სხვა პრეფექტურებთან დაკავშირებით მსჯელობა ჯერ კიდევ მიმდინარეობს.
შეგახსენებთ, იაპონიის ხელისუფლებამ ტოკიოში ოლიმპიადის განმავლობაში საგანგებო რეჟიმის ამოქმედების შესახებ განაცხადა. იაპონიის დედაქალაქში საგანგებო მდგომარეობა 12 ივლისიდან 22 აგვისტომდე გასტანს და შესაბამისად, ოლიმპიადის დღეებსაც მოიცავს.
საგანგებო ვითარების შემოღების გადაწყვეტილება უკავშირდება ტოკიოში ეპიდემიოლოგიური სიტუაციის დამძიმებას. ინფიცირებულთა რიცხვი მკვეთრად იზრდება. ბოლო 24 საათში 920 ახალი შემთხვევა აღირიცხა, რაც ივნისის ბოლოს აღრიცხულ რაოდენობას ორჯერ აღემატება.