ჰაიტის უსაფრთხოების ძალების განცხადებით, პრეზიდენტ ჟოვენელ მოიზის მკვლელობაში მონაწილე 4 პირის ლიკვიდაცია მოახდინეს.
მათივე ცნობით, კიდევ ორი ადამიანი დააკავეს. სპეცოპერაცია მკვლელობაში მონაწილეთა დაკავების მიზნით კვლავ გრძელდება.
პრემიერ-მინისტრ კლოდ ჟოზეფის განცხადებით, თავდამსხმელები უცხოელები იყვნენ, რომლებიც ინგლისურად და ესპანურად საუბრობდნენ. ჰაიტის ოფიციალური ენებია კრეოლი და ფრანგული.
ზოგიერთი ცნობით, თავდამსხმელები შემოსილები იყვნენ შეერთებული შტატების ნარკოტიკებთან ბრძოლის სააგენტოს თანამშრომელთა ფორმებით, რათა შეექმნათ შთაბეჭდილება, რომ ნარკოდანაშაულთან ბრძოლის ოპერაციას აწარმოებდნენ.
შეერთებულ შტატებში ჰაიტის ელჩის განცხადებით, პრეზიდენტი მოიზი მოკლეს კარგად ორგანიზებულმა უცხოელმა დაქირავებულმა, პროფესიონალმა მკვლელებმა.
ჰაიტის პრეიზდენტი ჟოვენელ მოიზი სასიკვდილოდ დაჭრეს ოთხშაბათს საღამოს, როდესაც მის სახლში შეიარაღებული დაუდგენელი პირები შეიჭრნენ. თავდასხმისას დაიჭრა პირველ ლედი მარტინ მოიზი, რომელიც მაიამის კლინიკაში გადაიყვანეს.
როგორც იუწყებიან, პირველი ლედის მდგომარეობა სტაბილურია, თუმცა კრიტიკული.
პრეზიდენტის მკვლელობის შემდეგ, პრემიერ-მინისტრმა კლოდ ჟოზეფმა ქვეყანაში საგანგებო მდგომარეობა გამოცხადდა.