ყაზახეთის დედაქალაქ ნურ-სულთანში ქვეყნის პირველი პრეზიდენტის, როგორც მას ყაზახეთში უწოდებენ, ერის ლიდერის, ნურსულთან ნაზარბაევის ძეგლი გახსნეს.
ძეგლის გახსნის ოფიციალურ ცერემონიაში მონაწილეობა მიიღო პრეზიდენტმა ყასიმ-ჟომართ თოყაევმა, რომელმაც შეაქო ნურსულდან ნაზარბაევი "ყაზახეთის სახელმწიფოებრიობის განვითარებასა და ქვეყნის საერთაშორისო ავტორიტეტის გაძლიერებაში შეტანილი ფასდაუდებელი წვლილისთვის".
"იგი გახდა გადამწყვეტი ცვლილებებისა და მასშტაბური რეფორმების შემოქმედი და ჩვენი დამოუკიდებლობის სიმბოლო", - დასძინა თოყაევმა.
ეს უკვე მეორე ძეგლია ნაზარბაევისა, რომელიც დედაქალაქში გაიხსნა. გასულ წელს, ნაზარბაევის ძეგლი თავდაცვის ეროვნულ უნივერსიტეტში აღმართეს.
ნურსულთან ნაზარბაევის სახელს ატარებს საერთაშორისო აეროპორტი, რამდენიმე საგანმანათლებლო დაწესებულება, რამდენიმე ქუჩა სხვადასხვა ქალაქში, პარკები და სკვერები.
2019 წელს ყაზახეთის დედაქალაქ ასტანას, პირველი პრეზიდენტის პატივსაცემად, ნურ-სულთანი უწოდეს.