ფრანგული ღვინისა და ალკოჰოლური სასმელების კომპანიამ Moёt & Chandon, რომელიც ამავე სახელწოდების შამპანურს აწარმოებს, დროებით შეაჩერა რუსეთში თავისი პროდუქციის მიწოდება.
გავრცელებული ინფორმაციით, აღნიშნულის შესახებ Moёt & Chandon-მა რუსეთში თავის პარტნიორებს წერილობით აცნობა.
შეგახსენებთ, წინა დღეს, რუსეთის ხელისუფლებამ უცხოურ კომპანიებს ტერმინ "შამპანურის" გამოყენება აუკრძალა.
როგორც წერილშია მითითებული, შამპანურის მომარაგების შეწყვეტა განპირობებულია ფედერალური კანონის "ალკოჰოლური სასმელების რეგულირების შესახებ" ცვლილებებით, რომელიც მიღებულ იქნა სახელმწიფო სათათბიროს მიერ და დამტკიცდა ფედერაციის საბჭოს მიერ ამ კვირის დასაწყისში. რუსეთის პრეზიდენტმა ვლადიმერ პუტინმა კანონპროექტს ხელი 2 ივლისს მოაწერა.
პრეზიდენტის მიერ დამტკიცებული კანონპროექტით გათვალისწინებულია ღვინის პროდუქტების დამატებითი მოთხოვნები. კერძოდ, დოკუმენტი გამორიცხავს "შამპანურის" კონცეფციას და მისი გამოყენების უფლებას იძლევა მხოლოდ რუსეთში წარმოებულ "რუსულ შამპანურთან" მიმართებაში.
"იგი ავალდებულებს შამპანურის მწარმოებლებს საფრაგენთის შამპან-არდენის რეგიონიდან თავიანთ პროდუქციას "ცქრიალა ღვინო" უწოდონ", - აღნიშნავს წერილში Moёt-ი.
როგორც წერილიდან ირკვევა, კანონში შესული ცვლილებები ავალდებულებს ღვინის კომპანიებს, ხელახლა მოახდინონ პროდუქციის სერტიფიცირება და წარმოადგინონ ახალი ეტიკეტირება, რომელზეც შამპანურის ნაცვლად მითითებული იქნება "ცქრიალა ღვინო".
კომპანია Moёt-ი აცხადებს, შამპანურის მწარმოებლებს არ დაუდასტურებიათ თავიანთი მზაობა რუსეთის ბაზარზე შეცვლის სანაცვლოდ, პროდუქციის კატეგორია შეცვალონ.