კანადაში იზრდება მოსახლეობის აღშფოთება ქვეყნის მკვიდრი მოსახლეობის განკუთვნილი სკოლა-პანსიონსების სიახლოვეს ბავშვების სამარხების აღმოჩენის გამო.
აღნიშნულთან დაკავშირებით საპროტესტო აქციის მონაწილეებმა კანადის მანიტობის პროვინციის დედაქალაქ უინიპეგში ბრიტანეთის იმპერიის დედოფლის, ვიქტორიას ქანდაკება ჩამოაგდეს.
მომიტინგეებმა დედოფალ ვიქტორიას ქანდაკებასთან ახლოს მდებარე დედოფალ ელისაბედ მეორის ქანდაკებაც დაამხეს.
ბრიტანელი მონარქების ქანადკებების ჩამოგდება დაემთხვა „კანადის დღეს“, ყოველწლიურ დღესასწაულს, რომელიც 1-ელ ივლისს აღინიშნება. ეს თარიღი დაკავშირებულია 1867 წელს ბრიტანული კოლონიების მიერ კანადის დაარსებასთან.
მოსახლეობის დიდი ნაწილი გამოდიოდა მოწოდებით, რომ ბავშვების სამარხების აღმოჩენის გამო, კანადის დღის აღნიშვნა გადაედოთ. ქვეყნის მრავალი მუნიციპალიტეტი ასეც მოიქცა.
დიდი ბრიტანეთის მთავრობამ დაგმო დედოფალ ვიქტორიასა და დედოფალ ელისაბედ მეორის ქანდაკებების ჩამოგდება.
მე-19, მე-20 საუკუნეების განმავლობაში, კანადის მკვიდრი მოსახლეობის ოჯახებიდან 150 000-ზე მეტი ბავშვი იძულებით მიჰყავდათ სკოლა-პანსიონებში, რათა მათი საზოგადოებაში ასიმილაცია ეიძულებინათ.
ამ სკოლებში სწავლისას დაახლოებით 6 000 ბავშვი დაიღუპა. მოსწავლეებს ხშირად ათავსებდნენ ცუდად აშენებულ, გათბობის გარეშე, ანტისანიტარიულ შენობებში.
