გერმანიის კანცლერი ანგელა მერკელი გაერთიანებულ სამეფოს ეწვია.
ვიზიტის ფარგლებში კანცლერი შეხვდება დიდი ბრიტანეთის პრემიერ-მინისტრ ბორის ჯონსონს. ლიდერების შეხვედრის მთავარი თემა კოვიდ-19-თან დაკავშირებული სამოგზაურო შეზღუდვები იქნება.
გასულ დღეებში ვრცელდებოდა ინფორმაცია, რომ ანგელა მერკელს სურდა ბრიტანელებისთვის ევროკავშირში შესვლა აეკრძალა. გერმანიის კანცლერი ცდილობდა დაერწმუნებინა ევროკავშირის ლიდერები, ბრიტანეთი კორონავირუსის "დელტა" ვარიანტის გავრცელების გამო, მაღალი რისკის ქვეყნების სიაში შეეყვანათ.
მერკელისა და ჯონსონის შეხვედრის დღის წესრიგში ასევე დგას სავაჭრო საკითხები და ბრექსიტის შემდეგომ ურთიერთობები.
კანცლერი მერკელი ასევე შეხვდება გაერთიანებული სამეფოს დედოფალს, ელისაბედ მეორეს. შეხვედრა უინძორის ციხე-სიმაგრეში გაიმართება.
ანგელა მერკელი სიტყვით გამოვა დიდი ბრიტანეთის მთავრობის კაბინეტის სხდომაზე. ის არის პირველი უცხოელი ლიდერი, რომელიც მთავრობას სიტყვით მიმართავს 1997 წლის პრეზიდენტ კლინტონის შემდეგ - თუმცა ამ შემთხვევაში შეხვედრა ვირტუალური იქნება.