უკრაინის უმაღლესმა რადამ ხუთშაბათს პირველი მოსმენით დაამტკიცა კანონპროექტი, რომელიც, უკრაინის პრეზიდენტის ვოლოდიმირ ზელენსკის თქმით, ხელს შეუწყობს ოლიგარქების გავლენის შეზღუდვას ქვეყანაში.
საერთაშორისო მოკავშირეები და დონორები აკრიტიკებდნენ კიევს იმის გამო, რომ იგი აქტიურად არ იბრძოდა ოლიგარქთა დომინირების წინააღმდეგ, რომელთა უმეტესობა კიევში დიდ გავლენებს ფლობს და კულისებიდან გავლენას ახდენს უკრაინის პოლიტიკაზე.
კანონპროექტი კანონად ქცევისთვის მეორე მოსმენითაც უნდა დამტკიცდეს. იგი განსაზღვრავს ოლიგარქის ცნებას და ითვალისწინებს ოლიგარქების რეესტრის შექმნას. ამასთან, კრძალავს ოლიგარქების მიერ პოლიტიკური პარტიების დაფინანსებას.
ოლიგარქებს ასევე მოეთხოვებათ წარადგინონ წლიური საშემოსავლო საგადასახადო დეკლარაცია.
კანონპროექტი ავალდებულებს ოფიციალურ პირებს, მათ შორის პრეზიდენტს, პრემიერ-მინისტრს, ცენტრალური ბანკის მმართველს, დეპუტატებს, სამხედრო მაღალჩინოსნებსა და სხვა მაღალი თანამდებობის პირებს, გაამჟღავნონ თავიანთი კავშირები, ნებისმიერი კონტაქტი ოლიგარქებთან.
იუსტიციის მინისტრმა დენის მალიუსკამ დეპუტატებს განუცხადა, რომ არსებობს ოთხი კრიტერიუმი, რომელიც განსაზღვრავს არის თუ არა ადამიანი ოლიგარქი:
მონოპოლური კომპანიის ბენეფიციარული საკუთრება
მნიშვნელოვანი გავლენა მედიაში
პოლიტიკური მონაწილეობა
2.4 მილიარდ გრივნაზე მეტი ქონება (დაახლოებით 87 მილიონი დოლარი)
"ოლიგარქად მიიჩნევა ადამიანი, რომელიც 4 კრიტერიუმიდან მინიმუმ სამს აკმაყოფილებს", - განმარტა იუსტიციის მინისტრმა.
ადგილობრივი მედია ვარაუდობს, რომ მინიმუმ 10 ყველაზე მდიდარი უკრაინელი შეიძლება აკმაყოფილებდეს ამ განმარტებას.
ზელენსკი პრეზიდენტად არჩევისთანავე პირობას დებდა, რომ შემაცირებდა ოლიგარქების გავლენას, მაგრამ ამ მიმართულებით მნიშვნელოვანი წინსვლა ამ დრომდე არ შეინიშნებოდა.