დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორმა, ამირან გამყრელიძემ განაცხადა, რომ საქართველოში კორონავირუსის ე.წ. ინდური შტამის კიდევ 2 ახალი შემთხვევა დადასტურდა, ხოლო ქვეყანაში სულ ამ შტამით ინფიცირების 20 შემთხვევა გამოვლინდა.
"18 შემთხვევის შემდეგ, დადასტურდა კიდევ ორი შემთხვევა, ანუ სულ 20 შემთხვევა გვაქვს. მოგეხსენებათ, ბრიტანეთში დაახლოებით ორიდან სამ თვემდე დასჭირდა, რომ მთლიანად ჩაანაცვლოს ტრადიციული და შემდეგ ბრიტანული შტამი. განმასხვავებელი კლინიკური ნიშანი ინდურ შტამს, ან სხვა შტამს არ აქვს. გახლავთ ერთადერთი ის, რომ ბრიტანული და ინდური შტამი ვრცელდება შედარებით სწრაფად", – თქვა ამირან გამყრელიძემ.
საქართველოში ვირუსის ე.წ. ინდური შტამის პირველი 5 შემთხვევა 27 მაისს დაფიქსირდა.
ჯანმრთელობის მსოფლიო ორგანიზაციამ, სტიგმატიზაციის თავიდან ასაცილებლად, კორონავირუსის შტამები ბერძნული ანბანის ასოებით დაასათაურა.
კორონავირუსის "ბრიტანულ ვარიანტს" ეწოდა ალფა, "სამხრეთაფრიკულს" - ბეტა, "ბრაზილიურს" - გამა და "ინდურს" - დელტა.
მანამდე, ინდოეთის მთავრობამ უკმაყოფილება გამოხატა იმის გამო, რომ მათ ქვეყანაში აღმოჩენილ შტამს ინდურს უწოდებდნენ.
