თეთრი სახლი უარყოფს გავრცელებულ ინფორმაციას, უკრაინისთვის სამხედრო დახმარების შეჩერების თაობაზე. ამის შესახებ თეთრი სახლის პრესმდივანმა, ჯენ ფსაკიმ განაცხადა.
"გავრცელებული ინფორმაცია იმის შესახებ, რომ ჩვენ უკრაინისთვის უსაფრთხოების დაცვა შევაჩერეთ, აბსურდია. გასულ კვირას, აშშ-რუსეთის სამიტის წინ, ჩვენ 150 მილიონი დოლარის პაკეტის ღირებულების უსაფრთხოების პაკეტის გამოყოფა უზრუნველყავით, მათ შორის ლეტალური იარაღის დახმარების სახით. სამიტამდე ორი დღით ადრე, პრეზიდენტმა ბაიდენმა ნატოს ტრიბუნიდა მთელი მსოფლიოს გასაგონად თქვა, რომ ჩვენ განვაგრძობთ უკრაინის "მხარდაჭერას, რომ შეძლოს წინააღმდეგობა გაუწიოს რუსულ ფიზიკურ აგრესიას". ჩვენ ასევე მოვამზადეთ გაუთვალისწინებელი თანხები უკრაინაში რუსეთის შემდგომი შეჭრის შემთხვევაში. როგორც პრეზიდენტმა ბაიდენმა პირდაპირ უთხრა პრეზიდენტ პუტინს, ჩვენ ურყევი ვიქნებით უკრაინის სუვერენიტეტისა და ტერიტორიული მთლიანობის მხარდაჭერაში", - ნათქვამია პრესმდივნის განცხადებაში.
მანამდე, გამოცემა Politico ანონიმურ წყაროებზე დაყრდნობით იტყობინებოდა, რომ ჯო ბაიდენის ადმინისტრაციამ უკრაინისთვის სამხედრო დახმარების პაკეტის მიწოდება დროებით შეაჩერა.
უფრო ადრე, შეერთებული შტატების თავდაცვის დეპარტამენტმა განაცხადა, რომ უკრაინა 150 მილიონი დოლარის ოდენობით სამხედრო დახმარებას მიიღებს.