ევროპის რეკონსტრუქციისა და განვითარების ბანკმა (EBRD) მხარი დაუჭირა პირველი მწვანე ობლიგაციის გამოშვებას 50 მილიონი აშშ დოლარის ინვესტიციით ფასიან ქაღალდებში, რომელიც ადგილობრივმა, სახელმწიფოს საკუთრებაში არსებულმა სარკინიგზო კომპანიამ, საქართველოს რკინიგზამ გამოსცა.
საერთო მოცულობამ 500 მლნ აშშ დოლარი შეადგინა და ობლიგაციას 7 წლის ვადა აქვს. ობლიგაცია შეფასდა 9 ივნისს, ხოლო ადგილობრივ და საერთაშორისო ინვესტორების მიერ გამოწერა მოხდა 17 ივნისს. ობლიგაცია განთავსდება ლონდონის საფონდო ბირჟაზე.
მიღებული თანხა მოხმარდება საქართველოს რკინიგზის არსებული ნოტების რეფინანსირებას, რომელსაც ვადა 2022 წელს გასდის და კომპანიის მწვანე ინფრასტრუქტურული პროექტების დაფინანსებას. ობლიგაციის წმინდა შემოსავლის ტოლი თანხა გამოყენებული იქნება, საქართველოს რკინიგზის მიერ, მწვანე ბონდის ჩარჩოს ფარგლებში, მომზადებული და მწვანე ობლიგაციის პრინციპების შესაბამისად ჩამოყალიბებული რელევანტური პროექტების დასაფინანსებლად ან რეფინანსირებისთვის. ჩარჩოს დადასტურება მოხდა S&P Credit Ratings-ით.
ეკატერინა მიროშნიკმა, EBRD–ის დირექტორმა და ინფრასტრუქტურა ევრაზიის ხელმძღვანელმა აღნიშნა: „ეს არის საქართველოს რკინიგზისა და საქართველოსთვის საეტაპო შეთანხმებაა. ჩვენ ძალიან ვამაყობთ, რომ მონაწილეობას ვიღებთ ამ წარმატებული მწვანე ობლიგაციის განთავსებაში. EBRD გეგმავს მწვანე დაფინანსების გაზრდას რეგიონში, რათა დაეხმაროს ქვეყნებსა და ბიზნესებს ნულოვან ემისიაზე გადასვლის პროცესში.“
,,საქართველოსა და კავკასიის რეგიონში პირველად, სატრანსპორტო კომპანიამ ლონდონის საფონდო ბირჟაზე გამოუშვა 500 მილიონი დოლარის მწვანე ობლიგაცია. რეფინანსირების შედეგად, საპროცენტო სარგებელი 7.75%-ის ნაცვლად განვახორციელეთ 4%-ში. კომპანია დაახლოებით 40 მილიონი დოლარის ნაცვლად, წელიწადში 20 მილიონ დოლარს გადაიხდის, დაზოგილი თანხა კი, რა თქმა უნდა, კომპანიის განვითარებას მოხმარდება. კიდევ ერთხელ, დიდი მადლობა მინდა გადავუხადო საქართველოს რკინიგზის გუნდს და ტრანზაქციაში ჩართულ ყველა პარტნიორს" - აცხადებს საქართველოს რკინიგზის გენერალური დირექტორი, დავით ფერაძე.
EBRD წამყვანი ინსტიტუციური ინვესტორია საქართველოში. ქვეყანაში მუშაობის დაწყების დღიდან, ბანკმა 4.1 მილიარდი ევროს ოდენობის ინვესტიცია განახორციელა 262 პროექტში - ფინანსურ, კორპორატიულ და ენერგო სექტორებში, ინვესტიციების 79 პროცენტი კერძო სექტორზე მოდის.
