ვაქცინაციის კამპანიის წარმატებით მიმდინარეობისა და კორონავირუსის გავრცელების ტემპის მკვეთრად შენელების გამო, დღეიდან ისრაელში დახურულ სივრცეებში პირბადის ტარება სავალდებულო აღარ არის. ინფორმაციას ადგილობრივი მედია ავრცელებს.
მედიის ცნობით, ჯანდაცვის სამინისტროს გენერალურმა დირექტორმა ხელი მოაწერა "საზოგადოებრივი ჯანდაცვის" კანონში შესატან ცვლილებებს, რომლის მიხედვითაც, 15 ივნისიდან დახურულ სივრცეში პირბადის ტარების ვალდებულება გაუქმდა.
ამ ცვლილების ამოქმედებამ შესაძლებლობა მისცა ქვეყნის მასშტაბით არსებულ სავაჭრო, სარესტორნო და სხვა კომერციულ დაწესებულებებს, განაახლონ თავიანთი ფუნქციონირება იმგვარად, როგორც პანდემიის დაწყებამდე იყო. ნიღბის ტარება აღარ იქნება სავალდებულო სავაჭრო, კომერციული, სამუშაო, საგანმანათლებლო და სხვა ტიპის დახურულ საზოგადოებრივი თავშეყრის ადგილებში.
მიუხედავად ამისა, არის რამდენიმე გამონაკლისი თუ რა შემთხვევაში უნდა მოხდეს პირბადის ტარება.
დახურულ სივრცეში პირბადის ტარება კვლავ სავალდებულო იქნება არავაქცინირებული ადამიანებისთვის, თანამშრომლებისა და იმ პირებისთვის, რომლებიც მოვლის დაწესებულებებში მუშაობენ და კონტაქტი აქვთ ინფიცირებულ პირებთან. პირბადის ტარების ვალდებულება ასევე ნარჩუნდება თვითმფრინავის მგზავრებისთვის.
ისრაელში ღია სივრცეში პირბადის ტარების ვალდებულება ჯერ კიდევ 18 აპრილს გაუქმდა.