„ბოლო ხანებში, გერმანიაში ეპიდემიოლოგიური ვითარების გაუმჯობესება შეინიშნება, თუმცა პანდემია არ დასრულებულა და ძალზედ გვაშფოთებს ბრიტანეთში ვირუსის დელტა ვარიანტის (ე.წ. ინდური შტამი) გავრცელება“, - ამის შესახებ გერმანიის კანცლერმა, ანგელა მერკელმა განაცხადა.
„ვირუსის ახალი შემთხვევების სტატისტიკა უაღრესად სასიხარულოა, თუმცა არ უნდა დავივიწყოთ, რომ კორონავირუსი არსად გამქრალა და ძალიან გვაშფოთებს, თუ როგორ ვრცელდება დელტა ვარიანტი დიდი ბრიტანეთში“, - განუცხადა მერკელმა ჟურნალისტებს გერმანიის ფედერალური მიწების ხელმძღვანელებთან შეხვედრის შემდეგ.
ანგელა მერკელის განცხადებით, გერმანიაში კორონავირუსის ახალი შემთხვევების 2.5% დელტა ვარიანტს უკავშირდება.
ამ თვის დასაწყისში, ჯანმრთელობის მსოფლიო ორგანიზაციამ, სტიგმატიზაციის თავიდან ასაცილებლად, კორონავირუსის შტამები ბერძნული ანბანის ასოებით დაასათაურა.
კორონავირუსის „ბრიტანულ ვარიანტს“ ეწოდა ალფა, „სამხრეთაფრიკულს“ - ბეტა, „ბრაზილიურს“ - გამა და „ინდურს“ - დელტა.
მანამდე, ინდოეთის მთავრობამ უკმაყოფილება გამოხატა იმის გამო, რომ მათ ქვეყანაში აღმოჩენილ შტამს ინდურს უწოდებდნენ.