მსოფლიოში საცხოვრებლად ყველაზე მოსახერხებელ ქალაქად ახალი ზელანდიის უდიდესი ქალაქი ოკლენდი დასახელდა.
გამომცემა Economist-ის ყოველწლიური რეიტინგი, რომელიც საცხოვრებლად საუკეთესო ქალაქებს ადგენს, კორონავირუსის პანდემიამ მნიშვნელოვნად შეცვალა.
ტრადიციულად საუკეთესო ქალაქების გამოსარჩევად ისეთ კრიტერიუმებს გამოიყენებენ როგორებიცაა სტაბილურობა, ინფრასტრუქტურა, განათლება და ჯანდაცვის ხელმისაწვდომობა, წელს პანდემია მთავარი განმსაზღვრელი ფაქტორი აღმოჩნდა.
ევროპული ქალაქები, რომლებიც გასულ წლებში რეიტინგში პირველობას არ თმობდნენ, იაპონიის, ავსტრალიისა და ახალი ზელანდიის ქალაქებმა "დაჯაბნეს".
რეიტინგის სათავეში მყოფმა ქალაქებმა დროულად მოახერხეს კორონავირუსის პანდემიაზე რეაგირება, შემთხვევების შემცირება და ვირუსის გავრცელების აღსაკვეთად დაწესებული შეზღუდვების შერბილება.
ევროკავშირის ქვეყნები, ვაქცინაციის პროგრამის განხორციელების ნელი ტემპების გამო, იძულებულები გახდნენ კვლავ დაეწესებინათ მკაცრი შეზღუდვები, რამაც, მაშინ როდესაც ავსტრალიაში, იაპონიასა და ახალ ზელანდიაში შეზღუდვები მინიმალურია, რეიტინგში მათ შედეგებზე გავლენა მოახდინა.
საცხოვრებლად საუკეთესო ქალაქების რეიტინგის სათავეში მყოფ ოკლენს მოსდევს იაპონური ქალაქი ოსაკა, შემდეგ მოდის ავსტრალური ქალაქი ადელაიდა, ახალი ზელანდიის დედაქალაქი ველინგტონი და იაპონიის დედაქალაქი ტოკიო.
Economist-ის განმარტებით, ოკლენდი რეიტინგის სათავეში კორონავირუსის პანდემიის წინააღმდეგ წარმატებული მიდგომის გამო აღმოჩნდა, რამაც შესაძლებლობა მისცა ქალაქს, საზოგადოებისთვის ღიად და ხელმისაწვდომად დარჩენილიყო.
ავსტრიის დედაქალაქი ვენა, რომელიც წლების მანძილზე ამ რეიტინგში პირველ ადგილს არავის უთმობდა, წლევანდელ ანგარიშში მე-12 ადგილზე გავიდა. ათეულში მხოლოდ ორი ევროპული ქალაქი - ციურიხი და ჟენევა მოხვდნენ (მე-7 და მე-8 ადგილზე).
2021 წლის საცხოვრებლად ყველაზე მოსახერხებელი 10 ქალაქი:
ოკლენდი, ახალი ზელანდია
ოსაკა, იაპონია
ადელაიდა, ავსტრალია
ველინგტონი, ახალი ზელანდია
ტოკიო, იაპონია
პერთი, ავსტრალია
ციურიხი, შვეიცარია
ჟენევა, შვეიცარია
მელბურნი, ავსტრალია
ბრიზბენი, ავსტრალია
2021 წლის საცხოვრებლად ყველაზე მოუხერხებელი 10 ქალაქი:
დამასკო, სირია
ლაგოსი, ნიგერია
პორტ-მორზბი, პაპუა-ახალი გვინეა
დაკა, ბანგლადეში
ალჟირი, ალჟირი
ტრიპოლი, ლიბია
კარაჩი, პაკისტანი
ჰარარე, ზიმბაბვე
დუალა, კამერუნი
კარაკასი, ვენესუელა
