აპრილიდან მოყოლებული გვაქვს ახალი რეალობა, პროგნოზებს უკვე გადავხედეთ და ეკონომიკური ზრდის მაჩვენებელი გავზარდეთ 6,5%-მდე, - აცხადებს ფინანსთა მინისტრი. ლაშა ხუციშვილის თქმით, საქართველოს ეკონომიკური ზრდა უნდა ყოფილიყო 3.5%, თუმცა ამის მიუხედავად ზარდა 4.3%-ის დონეზე დაიგეგმა, ხოლო ამ ეტაპისთვის მთავრობამ არსებული პროგნოზების გადახედვაც მოახდინა.
"ლარის კურსის კონკრეტულ ნიშნულთან დაკავშირებით ფინანსთა სამინისტრო პროგნოზებს არ აკეთებს. ამის კონკრეტული პროგნოზირება არის შეუძლებელი, თუმცა შეგვიძლია ვისაუბროთ იმ ფაქტორებზე, რომლებიც ახდენს ლარის კურსზე გავლენას. ახალი რეალობა გვაქვს ეკონომიკური მიმართულებით პირველი კვარტლისგან განსხვავებით, როდესაც გაკეთდა პროგნოზები, მათ შორის საერთაშორისო ორგანიზაციების მხრიდან. საუბარი იყო იმაზე, რომ საქართველოს ეკონომიკური ზრდა უნდა ყოფილიყო 3.5%, ჩვენ ამის მიუხედავად დაგეგმილი გვქონდა 4.3%. დავიწყეთ საუბარი ჯერ კიდევ ერთი თვის წინ, რომ ეს პროგნოზები გადაიხედებოდა, გამომდინარე იქიდან, რომ ჩვენ ვხედავთ დადებით ცვლილებებს. აპრილის თვიდან მოყოლებული გვაქვს ახალი რეალობა, იქიდან გამომდინარე, რომ პროგნოზებს უკვე გადავხედეთ და ეკონომიკური ზრდის მაჩვენებელი გავზარდეთ 6,5%-მდე და ასევე წარვადგინეთ, პოზიტიური სცენარის შემთხვევაში, რა იქნებოდა ეკონომიკური ზრდა და ეს იქნება ორნიშნა მაჩვენებელი, რაც საკმაოდ მაღალი მაჩვენებელია. ცალსახად შეგვიძლია ვთქვათ, რომ ეკონომიკური კლება, რაც გასულ წელს გვქონდა, მისი კომპენსირება სრულად მოხდება მიმდინარე წელს და იქნება იმაზე მაღალი ვიდრე გასულ წელს კლება იყო. ეს მოგვცემს იმის შესაძლებლობას, რომ საქართველოს ეკონომიკა იმაზე სწრაფად აღდგეს, ვიდრე ნავარაუდევი იყო. გარდა ამისა, გვაქვს საკმაოდ ბევრი ფაქტორი, რომელიც ამ პროგნოზებს ამყარებს. ეს არის ექსპორტის მიმართულებით დადებითი მაჩვენებელი, დაახლოებით 70%-იანი ზრდა აპრილის თვეში, ფულადი გადმორიცხვების ზრდა 145%-ის ოდენობით. ვხედავთ, რომ ეკონომიკური ზრდა, რომელიც აპრილის თვეში დაფიქსირდა, არ არის ერთი სექტორიდან გამომდინარე, ეს დაფიქსირდა ეკონომიკის ყველა სექტორზე და აღდგენის ნიშანი არის მთლიანად ეკონომიკასთან მიმართებაში. ყველა ეს ფაქტორი და პოლიტიკური სტაბილურობა ხელს უწყობს მოლოდინების და განწყობების გაუმჯობესებას ეკონომიკაში. ამ რეალობის ასახვა ხდება ლარის კურსზეც, თუმცა კონკრეტულად რა წონასწორობის ნიშანი იქნება, ეს მომავალში გამოჩნდება. ვფიქრობ, მომდევნო პერიოდი იქნება უფრო სტაბილური, დიდი მერყეობის გარეშე”, - განაცხადა ლაშა ხუციშვილმა.