შეერთებული შტატების პრეზიდენტ ჯო ბაიდენისა და რუსეთის პრეზიდენტ ვლადიმირ პუტინის შეხვედრა შესაძლოა შვეიცარიაში გაიმართოს. იუწყება რუსული გამოცემა "კომერსანტი" წყაროზე დაყრდნობით.
გამოცემის ინფორმაციითვე, პრეზიდენტების შეხვედრის ადგილსამყოფელთან დაკავშირებით საბოლოო გადაწყვეტილება ჯერ მიღებული არ არის.
წყაროს ინფორმაციით, პრეზიდენტების შეხვედრის საკითხი მნიშვნელოვნად იქნება დამოკიდებული ამ კვირაში რუსეთის საგარეო საქმეთა მინისტრ ლავროვისა და სახელმწიფო მდივან ბლინკენის შეხვედრაზე. ენტონი ბლინკენისა და სერგეი ლავროვის შეხვედრა 20 მაისს, რეიკიავიკში, არქტიკული საბჭოს საგარეო საქმეთა მინისტრების სამიტის ფარგლებშია დაგეგმილი.
კრემლი ჯერჯერობით ოფიციალურ თანხმობას არ აცხადებს ბაიდენთან შეხვედრაში პუტინის მონაწილეობაზე.
გასულ თვეს ბაიდენი გამოვიდა მოწოდებით, რუსეთის პრეზიდენტან ერთობლივი სამიტის გამართვის შესახებ, სადაც მრავალ სადავო საკითხებს განიხილავდნენ.
მაშინ კრემლმა თქვა, რომ სამიტი დამოკიდებული იქნება აშშ-ის ქმედებებზე და, ზოგიერთი ცნობით, ვაშინგტონს მოუწოდა უარი ეთქვა რუსეთისთვის ახალი სანქციების დაწესებაზე.
ცივი ომის დასრულების შემდეგ, რუსეთსა და ამერიკის შეერთებულ შტატებს შორის ურთიერთობების სიმწვავე ახალ ნიშნულს მიუახლოვდა, როდესაც ბაიდენმა ერთ-ერთ ინტერვიუში, დადებითად უპასუხა შეკითხვას, ფიქრობს თუ არა, რომ პუტინი მკვლელია. მალევე კრემლმა საკუთარი ელჩი კონსლუტაციებისთვის მოსკოვში გამოიძახა.
მოსკოვის პროტესტის მიუხედავად, აპრილში აშშ-მა ახალი სანქციები დააწესა რუსეთის წინააღმდეგ 2020 წლის არჩევნებში ჩარევის, კიბერშეტევის და სხვა მავნე მოქმედებების გამო.
