"თავისუფალი დემოკრატების" ლიდერმა ირაკლი ილასანიამ სოფლის მეურნეობის განვითარებისთვის ხელისუფლებას კონკრეტული ნაბიჯების გადადგმისკენ მოუწოდა.
ამის შესახებ მან პარტიის ოფისში გამართულ ბრიფინგზე ისაუბრა.
მისი თქმით, აუცილებელია სოფლის მეურნეობის სუბსიდირება; სოფლის მეურნეობაში სხვადასხვა საფინანსო მომსახურების მიწოდების სტიმულირება და ინვესტიციების მოზიდვის უზრუნველყოფა; ბაზარზე ორიენტირებული აგროსასურსათო მრეწველობის სტიმულირება, მისი კონკურენტუნარიანობის ამაღლება, სასოფლო-სამეურნეო პროდუქციის საბითუმო ბაზრის განვითარება; რეგიონებში სოფლის მეურნეობის განვითარების ფონდების და სოფლად ხელმისაწვდომი საფინანსო ინსტიტუტების შექმნა; შიდა ბაზრის დაცვა ფალსიფიცირებული, კონტრაბანდული და დემპინგური პროდუქციისგან.
"ხელისუფლება უპასუხისმგებლო პოლიტიკას ატარებს სოფლის მეურნეობაში. ბიუჯეტის მხოლოდ 1 % -ია გამოყოფილი სოფლის მეურნეობის განვითარებისთვის. შემცირდა სოციალურად დაუცველი ოჯახების მიერ კვების პროდუქტების მოხმარების მაჩვენებელი. მაგალითად 2009 წელს საქართველოს მოსახლეობამ ერთ სულზე გაანგარიშებით მოიხმარა უფრო ნაკლები ბოსტნეული, ხორცი, რძის ნაწარმი, კვერცხი და სხვა პროდუქტი, ვიდრე 2003 წელს. ხელისუფლებად დღემდე არ გააჩნია სოფლის მეურნეობის განვითარების სტრატეგია. ხელისუფლების დაპირების მიუხედავად არ მუშაობს პროგრამები "ტრაქტორი ყველა სოფელს" და "იაფი სესხი". უმეტეს სოფლებში მოშლილია სამელიორაციო სისტემა", - განმარტა ალასანაიამ.
როგორც მან აღნიშნა, განსაკუთრებით საგანგაშოა ხორბლის, ხილის, ბოსტნეულის, ბაღჩეულისა და კარტოფილის მოსავლიანობის კლება, შემცირდა პირუტყვისა და ფრინველის სულადობის მაჩვენებლები. მისი განმარტებით, კატასტროფულად დაიკლო ხორბლის ნათესების ფართობმა და მოსავლის რაოდენობამ. მისი თქმით, 2003 წელს ხორბლის მოსავალი აჭარბებდა 200 000 ტონას, 2010 წელს კი მხოლოდ 45 ათასი ტონა იყო.
