ამნისტია არის გზა არა დავიწყებისკენ, არამედ იარების მოშუშებისკენ, რომ ჩვენ არ ვიყოთ ჩაჭიდებული წარსულ დრამას, ტკივილს და შევძლოთ, წინ წავიდეთ - განაცხადა დეპუტატმა სალომე სამადაშვილმა, პარლამენტის პლენარულ სხდომაზე.
სამადაშვილის განცხადებით, ქვეყანაში კრიზისი არ დასრულდება, ვიდრე სრული ოპოზიციური სპექტრი არ გაერთიანდება შეთანხმების გარშემო.
"მინდა გამოვეხმაურო ერთ-ერთ ყველაზე მნიშვნელოვან პრობლემას, რომელიც უკანასკნელ დღეებში იპყრობს საზოგადოების ყურადღებას. ეს არის 19-21 ივნისის მოვლენების ამნისტია. ვერასდროს და ვერავინ ამოშლის ჩვენი ხალხის ისტორიული მეხსიერებიდან იმას, რაც იმ დღეს მოხდა, როდესაც დაიცვა ასობით ათასმა მოქალაქემ ჩვენი ქვეყნის ღირსება და ვერც ამ პარლამენტის ისტორიიდან ამოიშლება ის დღე, როდესაც მე ჩემს მეგობრებთან ერთად აქ, ამ დარბაზიდან გავაძევეთ ბატონი გავრილოვი და სამწუხაროდ, ვერც ის დღე ამოიშლება, როდესაც ამ დარბაზში მოეხსნა იმუნიტეტი ნიკა მელიას მის დასაპატიმრებლად. ამნისტია, ეს არის გზა არა დავიწყებისკენ, არამედ იარების მოშუშებისკენ. იმისთვის, რომ ჩვენ არ ვიყოთ ჩაჭიდებული წარსულ დრამას, წარსულ ტკივილს და შევძლოთ, როგორც საზოგადოებამ რომ წინ წავიდეთ", - განაცხადა სამადაშვილმა.
