გაერთიანებული სამეფოს დედოფლის ელისაბედ მეორის მეუღლე, ედინბურგის ჰერცოგი, პრინცი ფილიპი უინძორის ციხე-სიმაგრეში, წმინდა გიორგის სახელობის სამლოცველოში დაკრძალეს.
ედინბურგის ჰერცოგს არ სურდა მისი დაკრძალვა ხალხმრავალ და ხმაურიან გარემოში გამართულიყო. კორონავირუსის პანდემიამ კი მისი სურვილის სრულად ასრულების შესაძლებლობა მისცა სამეფო ოჯახს. დაკრძალვას დაესწრო გარდაცვლილის მხოლოდ 30 უახლოესი ნათესავი.
ჰერცოგი დაკრძალეს სამლოცველოს სამეფო აკლდამაში, თუმცა ის მხოლოდ პრინცის დროებითი განსასვენებელი იქნება, დედოფლის გარდაცვალების შემდეგ პრინც ფილიპის ნეშტს გადაასვენებენ იმ ადგილზე, სადაც უკვე განისვენებენ დედოფლის მშობლები - მეფე ჯორჯ VI და დედოფალი ელისაბედი, მისი უმცროსი და პრინცესა მარგარეტი და სადაც დაიკრძალება თავად ელისაბედ მეორე.
პრინცი ფილიპი 99 წლის ასაკში 9 აპრილს გარდაიცვალა. პრინცი პრინცესა ელისაბედზე 1947 წელს დაქორწინდა.
სამეფო წყვილს ოთხი შვილი, რვა შვილიშვილი და 10 შვილთაშვილი ჰყავს.
