ოპოზიციური პოლიტელიტა 19 აპრილს რიყეზე შეიკრიბება და გააჟღერებს 15 მაისის აქციის გეგმას - ამის შესახებ "ლეიბორისტული პარტიის" ლიდერმა, შალვა ნათელაშვილმა, ოპოზიციის შეხვედრის დასრულების შემდეგ თქვა.
ნათელაშვილის თქმით, ოპოზიციონერმა პოლიტიკოსებმა დღეს ლეიბორისტების ოფისში გამართულ შეკრებაზე სამომავლო საპროტესტო აქციის საორგანიზაციო საკითხებზე იმსჯელეს.
"19 აპრილს მოხდება, საერთო ოპოზიციური პოლიტელიტის შეკრება, რიყეზე, ამფითეატრში, სადაც იქნება ის სტრატეგია ხმამაღლა გაჟღერებული, თუ რას ვაპირებთ 15 მაისს. ხოლო, 15 მაისს მთელ საქართველოს ველოდებით რუსთაველის გამზირზე, მაგრამ ამის სწორი დაგეგმვისათვის, დღეს ჩატარდა აუცილებელი ღონისძიებები და გაიცვალა ის აზრები, რომელიც საჭირო იყო გაერთიანებულიყო", - თქვა შალვა ნათელაშვილმა.
ამასთან, ნათელაშვილმა თქვა, რომ იმსჯელეს ბიძინა ივანიშვილისა და მისი გარემოცვის სანქცირების მიზნით, ევროკავშირისა და სახელმწიფო დეპარტამენტის მიმართვის შესახებ.
"ვიმსჯელეთ იმაზე, რომ დადგა დრო, მივმართოთ სახელმწიფო დეპარტამენტს, ევროპის კავშირს, ბიძინა ივანიშვილისა და მისი გარემოცვისთვის პერსონალური სანქციების დაწესებაზე, რაც დააჩქარებს მიმდინარე პოლიტიკური კრიზისის განმუხტვას ცივილიზებულად და სამართლიანად. თუნდაც იმით, რომ ჩვენგან მიტაცებული მილიარდები იქნება გაყინული და მერე დაბრუნებული საქათველოს ბიუჯეტში. ამ საკითხზე შედგება სათანადო პროექტი, რასაც წარვუდგენთ მსოფლიო თანამეგობრობას", - განაცხადა ნათელაშვილმა.