ევროპარლამენტარი მარინა კალიურანდი მიესალმება "ქართული ოცნების" ხელმოწერას კრისტიან დანიელსონის მიერ შემუშავებულ განცხადებას და ამბობს, რომ ახლა ჯერი ოპოზიციაზეა. ამის შესახებ კალიურანდმა "პირველ არხთან" საუბრისას აღნიშნა.
ევროპარლამენტარ კალიურანდის განცხადებით, "ქართული ოცნების" ეს ნაბიჯი ნამდვილად იმსახურებს აღიარებას.
"ასე რომ, ჩემი რჩევა ოპოზიციის მიმართ იქნება, დათანხმდით ამ წინადადებას. მიუხედავად იმისა, რომ ბევრი გადაწყვეტილება შეიძლება, იყოს რთული. ჩემი აზრით, "ქართული ოცნების" მიერ დღეს გადადგმულმა ნაბიჯმა აჩვენა, რომ უნდა იყო სახელმწიფოებრივად მოაზროვნე, ნამდვილი პატრიოტი და უნდა დააყენო შენი ქვეყნის ინტერესები პოლიტიკური პარტიის ინტერესებზე მაღლა. გადაწყვეტილება შეიძლება იყოს რთული, შეიძლება გაგაკრიტიკონ, მაგრამ ყოველთვის უნდა გახსოვდეთ, რა არის მნიშვნელოვანი თქვენი ხალხისთვის.
საქართველო ელოდება პარლამენტს. დეპუტატებმა მიიღეს მანდატები ხალხისგან. ხალხმა თავისი სიტყვა თქვა, ახლა ოპოზიციონერი პოლიტიკოსების ვალდებულებაა, ეს მანდატები აიღონ, შევიდნენ პარლამენტში და დაიწყოს მუშაობა ისე, როგორც ეს ძლიერ ოპოზიციას შეჰფერის", - განაცხადა კალიურანდიმ.
შეგახსენებთ, პარლამენტის თავმჯდომარე არჩილ თალაკვაძემ განაცხადა, რომ "ქართული ოცნება" საჯაროდ მოაწერს ხელს კრისტიან დანიელსონის მიერ მომზადებულ დოკუმენტს.
კრისტიან დანიელსონმა საქართველოსთვის სამომავლო გზასთან დაკავშირებით საქართველოს პოლიტიკური პარტიების წარმომადგენლებს წინადადება 31 მარტს შესთავაზა.
