უკრაინის საგარეო საქმეთა მინისტრის, დმიტრო კულებას განცხადებით, დღეს საფრანგეთისა და გერმანიის ლიდერების ქმედებები მიმართულია იქითკენ, რომ რუსეთს უკრაინის წინააღმდეგ შემდგომი ესკალაციის უგუნურება დაანახონ.
კულებას განცხადებით, ახლა უკრაინა იმყოფება ფაზაში, როდესაც მაქსიმალურად ბევრი ვერბალური სიგნალი და მოწოდება უნდა გაისმას რუსეთის მიმართ ყველა არხით.
"გერმანია და საფრანგეთი გზავნიან ამ სიგნალებს. თქვენ ნახეთ ანგელა მერკელის განცხადებები პუტინთან საუბრის შემდეგ. მაგრამ ჩვენ უნდა გვესმოდეს, რომ ღმერთმა ნუ ქნას, შესაძლოა, ისეთი ფაზა დადგეს, როცა შეშფოთება და მოწოდებები რუსეთისთვის საკმარისი არ იქნება", - განაცხადა უკრაინის საგარეო საქმეთა მინისტრმა.
კულებამ ასევე აღნიშნა, რომ საჭიროა საუბარი იმაზე, თუ რა სახის პრაქტიკული დახმარების მიღება შეეძლება უკრაინას, თუ სამხედრო მოქმედებები ფართომასშტაბიან სახეს მიიღებს.
