ბრაზილიაში ქრისტეს კიდევ ერთ ქანდაკებას დგამენ, რომელიც რიო დე ჟანეიროში, კორკოვადოს მთაზე არსებულ ქრისტეს ქანდაკებაზე მაღალია.
ახალი ქანდაკება ბრაზილიის სამხრეთით მდებარე ქალაქ ენკანტადოში განთავდება. მისი სიმაღლე, კვარცხლბეკის ჩათვლით, 43 მეტრი იქნება, რაც მას მსოფლიოში ქრისტეს მესამე ყველაზე მაღალ ქანდაკებად აქცევს.
რიო დე ჟანეიროში არსებული ქრისტეს ქანდაკების სიმაღლე 30 მეტრია.
ქანდაკების დამონტაჟება 2019 წელს დაიწყო. გასულ კვირას კი თავი და ხელები დაამონტაჟეს. ახალი ქანდაკების იდეა ადგილობრივმა პოლიტიკოსმა წამოაყენა, რომელიც მარტში კოვიდ-19-მა იმსხვერპლა.
პროექტის ღირებულება 350 ათასი დოლარია. ქანდაკების მონტაჟი სავარაუდოდ წლის ბოლოსთვის დასრულდება.
მსოფლიოში ქრისტეს ყველაზე მაღალ ქანდაკებად ითვლება ინდონეზიაში, სულავესში მდებარე ქანდაკება, რომლის სიმაღლე, კვარცხლბეკის ჩათვლით 52.55 მეტრია. მას მოსდევს პოლონეთში მდებარე ქანდაკება, რომლის სიმაღლე 52.5 მეტრია.
