არ არის კარგი, როდესაც პარტიას ვინმე ტოვებს, მაგრამ არანაკლებ გამოცდილი ფიგურები არიან ჩვენს პარტიაში, რომლებიც მოახერხებენ მათ ღირსეულად ჩანაცვლებას, აცხადებს ევროპული საქართველოს წარმომადგენელი ოთარ კახიძე. მისი განმარტებით, ის პარტიის თავმჯდომარედ გიგა ბოკერიას განიხილავს.
„ყოფილი თანაგუნდელებისგან განსხვავებით, არ ვაპირებ არც მათკენ ხელის გაშვერას, არც რაიმე ტიპის უკუგადაბრალებას და ეს განხილვები არ მიმაჩნია ზოგადად ლამაზად. რაც შეეხება მათ წასვლას არ არის კარგი, როდესაც პარტიას ვინმე ტოვებს, მაგრამ არანაკლებ გამოცდილი ფიგურები არიან ჩვენს პარტიაში, რომლებიც მოახერხებენ მათ ღირსეულად ჩანაცვლებას, ვგულისხმობ აკაკი ბობოხიძეს, გიგი წერეთელს, ყველაზე დიდი სტაჟის მქონე პარლამენტარებს და ძალიან დიდი გამოცდილების მქონე პოლიტიკოსებს, ასევე გიგა ბოკერიას, რომელსაც მე განვიხილავ „ევროპული საქართველოს“ თავმჯდომარედ. იმედი მაქვს, რომ ამ საკითხთან დაკავშირებით იქნება საერთო პოზიცია. ვთვლი, რომ ის არის გამორჩეული ფიგურა თავისი პრინციპულობით, პირველ რიგში, თანმიმდევრულობით და იმ ღირებულებების ერთგულებით, რომელსაც ეფუძნებოდა ზოგადად „ვარდების რევოლუცია“ 2003 წელს“, – განაცხადა ოთარ კახიძემ.
