"ქართული ოცნება" სულ რომ გაიწიოს პოლიტიკური ველიდან, დარჩება საზოგადოება, პოლიტიკოსები რომლებიც ბოლომდე დაანგრევენ ამ ქვეყანას და ქვას ქვაზე არ დატოვებენ - ამის შესახებ პარლამენტის თავმჯდომარის მოადგილემ, გიორგი ვოლსკიმ "რუსთავი 2"-ის ეთერში განაცხადა.
ვოლსკი გამოეხმაურა პარტია "კანონი და სამართლის" ლიდერის თაკო ჩარკვიანის განცხადებას, რომელმაც თქვა, რომ ოპოზიციას პარლამენტში რეალური რეფორმების მოხდენის საშუალება და ბერკეტები არ ექნება.
როგორც გიორგი ვოლსკი ამბობს, არსებობს მექანიზმები, რომლითაც ოპოზიციას შეეძლება მთავრობის საქმიანობის გაკონტროლება.
"როდესაც ამბობ, რომ ბიუჯეტი მოიტაცეს და წაიღეს, შენ გაქვს საშუალება, რომ აუდიტის სამსახურის მეშვეობით გააკონტროლო და ჰაერზე არ იძახო, ვინ წაიღო, ვინ შეჭამა, რა ბიუჯეტი წაიღეს. თუ ეგეთი რამ არსებობს, გაცილებით მეტი რესურსი გაქვს, რომ ამ თემას მიაქციო ყურადღება. უფრო მეტიც, რომელ თემაზეც გინდა, 50 კაცს შეუძლია საგამოძიებო კომისია შექმნას და თქვენ იცით, რას წარმოადგენს საპარლამენტო საგამოძიებო კომისია. მაგრამ როდესაც ადამიანი არის სააკაშვილთან სიაში და თან ამ დროს ამბობს, რომ სააკაშვილმა ჩააბარა ტერიტორიები, ეს რას ნიშნავს იცით? ეს ნიშნავს იმას, რომ "ქართული ოცნება" სულ რომ გაიწიოს პოლიტიკური ველიდან, დარჩება საზოგადოება, პოლიტიკოსები რომლებიც ბოლომდე დაანგრევენ ამ ქვეყანას და ქვას ქვაზე არ დატოვებენ", - თქვა ვოლსკიმ.
